Inxhinieri elektrik, Azmer Duleviç, komenton situatën hidrike në vend dhe thotë se reshjet e ditëve të fundit kanë ndikuar që të rritet pak niveli dhe prurjet në tre hidrocentralet kryesore.
Në një lidhje me studion e lajmeve të MCN, Duleviç tha se nga të dhënat e siguruara nga KESH tregohet se kemi përmirësim sado të vogël i cili shtoi sado pak prodhimin në tre hidrocentralet kryesore në vend.
Sipas tij, kuotat janë goxha larg niveleve që duhet të jenë, në mënyrë që prodhimi i energjisë në këto tre hidrocentrale të jenë maksimum.
“Të tre hidrocentralet prodhojnë mesatarisht 17 mijë megavat orë. Patjetër, nga dita e sotme në Kosovë kanë filluar kufizimet, priten dhe nga kufizimet që situata do jetë më e rëndë në ditët në vazhdim, se jemi akoma në gusht, imagjino çfarë do ndodhë në vjeshtë.
Momentalisht në vendin tonë situata paraqitet më mirë, por nuk parashikohet dot nëse do jemi më mirë apo më keq. Bazuar dhe në deklaratat e Ramës, në vjeshtë ne do jemi në një krizë energjetike, ku besoj se në zona të caktuara do kemi ndërprerje të energjisë”, u shpreh inxhinieri.
Lidhur me thirrjet e qeverisë që qytetarët të ndërgjegjësohen dhe të ulin konsumin pa kriter të energjisë, deklaroi se në kohë krize çdo gjë e propozuar është zgjidhje.
“Por qeveria duhet të ketë fushata sensibilizuese edhe nga media. Duhen marrë masa publicitare edhe në media, se si të kursehet energjia. Qytetarët duhet të informohen në çfarë mënyrë duhet të kursejnë, në mënyrë që situata të mos degradojë apo rëndohet në vjeshtë që të mbetemi pa energji dhe të shkojmë të gjeneratorët.
Nga mesatarja e javës së parë dhe dytë të gushtit, 3.1 milionë euro energji elektrike nga jashtë blihet.
Në ditë blihet një sasi e madhe që rëndon taksat e shqiptarëve. Aktualisht tre hidrocentralet më kryesore, prodhojnë 17 mijë megavat orë në ditë. Kërkesa për energji elektrike është 19 mijë, 2 mijë blihen. Flas për 3 hidrocentralet më të mëdha në vend, pa përfshirë ato private. Prodhimi vendas është rreth 55% e nevojës për energji dhe pjesën tjetër e importojmë, blejmë nga jashtë”, theksoi Duleviç.
