Mali i Zi vijon uljen e çmimit të karburanteve, ndërkohë që Shqipëria renditet ndër vendet ku çmimet e shitjes me pakicë të naftës dhe benzinës janë në kuota shumë të larta, pavarësisht çmimeve në bursa, që kanë pësuar rënie.
E ndërsa në Shqipëri u pasqyrua menjëherë rritja e çmimit në bursa, nuk ndodhi e kundërta, pra ulja e çmimit. Në Shqipëri nafta tregtohet me vendim të Bordit të ngritur nga Edi Rama me 221 lekë për litër, ndërsa benzina me 202 lekë për litër.
Ndërkohë në Malin e Zi, duke nisur nga dita e martë, një litër naftë kushton 1.39 euro ose 160 lekë për litër, duke u ulur çmimi me 9 cent për litër.
Dy llojet e benzinës, në Malin e Zi, do të ulen me 10 deri në 11 cent për litër.
Ulja e çmimeve në Podgoricë ndjek reduktimin e akcizës së naftës prej 50%, një masë e qeverisë malazeze e miratuar javë më parë.
Çmimet e derivateve të naftës në Mal të Zi vazhdojnë të jenë më të ulëtat në rajon.
Çmimi i benzinës është më i ulët edhe se në Maqedoninë e Veriut, ku aktualisht për një litër maqedonasit paguajnë 171 lekë ose 1,47 euro.
