Ish deputeti i PD-së, Gert Bogdani, i ftuar në studion e Fax News, ka folur lidhur me ngjarjet e fundit të ndodhura në vend dhe mungesën e theksuar të sigurisë të qytetarëve.
Bogdani tha se për rastin e fundit të ndodhur në Himarë ku humbi jetën një 7 vjeçare, duhet të kishte dorëheqje duke nisur nga ministrat, duke kujtuar edhe precedentin e mëparshëm të dorëheqjes së Mediut nga posti i ministrit të Brendshëm.
Ndërsa shtoi se në Shqipëri nuk kishte kulturë të dorëheqjes për shkak të moralit dhe se përgjegjësia për ngjarje të tilla tronditëse niste që nga i pari i qeverisë, kryeministri Edi Rama.
“Këtu duhet të ketë dorëheqje të personave që janë në nivelet e larta dhe që duhet të mbajnë përgjegjësi për ngjarje të tilla. Dhe më tej duhet të ketë masa të menjëhershme dhe drastike për të parandaluar raste të tjera të ngjashme sepse rasti i Jonadës ishte fatkeqësi por nuk ishte rasti i parë. Në këtë rast duhet të kishte dy hapa, e para dorëheqja dhe masa të tjera drastike.
Një shtet që sillet në mënyrë arrogante me qytetarët e vetë, nuk respekton dinjitetin njerëzor.
Kemi rastin e zotit Mediu që ka dhënë dorëheqjen. Rastet e tilla janë shumë të pakta. Në Shqipëri nuk ka një kulturë të dorëheqjes për shkak të moralit, duke mbajtur përgjegjësi për ngjarjet e ndodhura.
Kryeministri thotë shpesh që nuk mban përgjegjësi për atë që bëjnë ministrat. Por në fund të ditës është ai që i menaxhon dhe i kontrollon. Personi përgjegjës është ai që drejton. Por Shqipëria nuk e ka një standart të tillë, prandaj edhe qytetarët detyrohen të protestojnë”, u shpreh Bogdani.
