Sokol Bode, ish-shefi i Postës së Policisë në Dhërmi, i dënuar me 8 vite burg nga Gjykata e Posaçme kundër Krimit të Organizuar dhe Korrupsionit, u arrestua mbrëmjen e sotme në Berat.
Nga raportimet mësohet se Bode prej disa kohësh kishte zgjedhur Britaninë e Madhe si vendin ku strehohej, edhe pse autoritetet shqiptare e kishin shpallur në kërkim, madje edhe ishte dënuar në mungesë nga GJKKO.
Nuk dihet se me çfarë identiteti ka hyrë në Shqipëri, apo rruga që ka ndjekur për të udhëtuar nga Britania në Shqipëri, ish-shefi i postës së Policisë së Dhërmiut, i cili u kap në Berat, që është vendlindja e tij. Nga raportimet mësohet se kapja e Bodes është realizuar përmes informacioneve operative, ndërsa në momentin e ndalimit ai nuk ka bërv rezistencë.
Sokol Bode u akuzua nga ish-Prokuroria e Krimeve të Rënda dhe më pas nga SPAK si i përfshirë në trafikun e drogës sëbashku me grupin e Habilajve.
Në Prill 2022 ish-shefi i Policisë së Dhërmiut, Sokol Bode u dënua me 8 vite burg nga SPAK për përfshirje në trafikun e marijuanës të kryer nga organizata kriminale e drejtuar nga vëllezërit Habilaj.
Bode ishte nga 3 ish-zyrtarët e Policisë së Vlorës që duhej arrestohej pas urdhër-arrestit të lëshuar nga Prokuroria e Krimeve të Rënda në vitin 2017.
Prokuroria e Posaçme, përveç Sokol Bodes, ka lëshuar edhe urdhër-arrestet për ish-drejtorin e Policisë së Vlorës, Jaeld Çela si dhe Gjergj Kohila, shefi i sektorit të luftës kundër krimit të organizuar.
Të tre ish-drejtuesit e Policisë së Vlorës kanë pasur pozicione kyçe në strukturat policore në drejtorinë e Qarkut Vlorë gjatë viteve 2015-2016, ndërsa rezultuan si të përfshirë në dosjen ‘Habilaj’ për trafikun e kanabisit.
Në dosjen e dorëzuar në Gjykatë e Posaçme për grupin “Habilaj”, janë renditur si provë e bashkëpunimit të anëtarëve të grupit kriminal Habilaj me Policinë edhe disa përgjime telefonike, ku mes përgjimeve është edhe biseda e Florian Habilajt me ish-shefin e Policisë Kufitare në Dhërmi, Sokol Bode, e regjistruar në dt.15 Tetor 2017, i cili e telefonon vetë për ta takuar në lagjen “Çole” në Vlorë.
Ndërsa janë zbardhur edhe disa biseda të përgjuara mes Armando Koçerrit, që u arrestua gjatë operacionit të Babicës, me motrën e tij, e cila e informon për aksionin e Policisë që po zhvillohej në fshat.
Prokuroria e Krimeve të Rënda e kishte shpallur në kërkim Boden dhe ka kryer ndër vite disa operacione për kapjen e tij, ku janë dekonspiruar nga kolegët. Sokol Bode në një nga rastet kur ishte njoftuar për aksionin e policisë për kapjen e tij, ishte larguar me automjet nëpërmjet Pikës Kufitare të Muriqanit.
