Nga Boldnews.al
Në vendimet më të fundit të qeverisë janë bërë disa ndryshime në emërime dhe shkarkime të funksionarëve të lartë publik. Në rastin e parë, duket se Rama ka “ngatërruar” Çuçin ministër ku po kërkohet dorëheqja nga qytetarët, me Çuçin zëvendësministre, e cila është nën Kumbaron, ku edhe për të kërkohet dorëheqje.
Rama ka shkarkuar nga detyra zëvendësministren e Turizmit dhe Mjedisit Ornela Çuçi, ndërsa një tjetër emër që gjendet kudo dhe shfrytëzon çdo rast është Denar Biba, ish kreu i KQZ-së. Sipas vendimit të qeverisë të publiuar në fletoren zyrtare, Juliana Latifi zëvendësohet me ish-kreun e KQZ-së Denar Biba.
Ai tashmë do të jetë si negociatore për kapitullin 5 me BE-në. Një vend tipik për Bibën e Rilindjes, pasi njihet si “sekser”. Ish-numri një i KQZ-së arriti deri në atë pikë sa t’i kërkonte ish-gjyqtarit të Gjykatës së Strasburgut Ledio Bianko që të ndërhynte në dëm të ish-pronarëve dhe favorizohej qeveria shqiptare për trajtimin e çështjes së pronave të Strasburg.
Në atë bisedë “sekserllëku”, Biba e shfaqi hapur ambiencien e tij për tu ngjitur majë më majë teksa shprehej se: “treni një herë të vjen në jetë, duhet të jesh në stacion që ti hipësh”. Në fakt Biba gjendet në çdo stacion ku ndalon “treni rrangallë” i mashinistit kryeministër.
Vetë Rama këtë ka parë si kriter kryesor tek Biba, pikërisht atë të “ndërmjetësit” të Rilindjes, por të jesh sekser politik në qeverinë shqiptare dhe negociator me ekspertët të BE-së, janë dy gjëra krejt të ndryshme, që nuk puqen aq në stacionet e autobusëve të Kombinatit.
Ai aty është, rri e pret, hip e zbrit nga një “vagon administrate” në një tjetër. Në profesion Biba është jurist, por ligjet e partisë njeh edhe më mirë, duke pritur për hipje e zbritje, pa u mërzitur me trenin e Rilindjes që duket se po del nga çdo shinë.
Por shkarkimi tjetër që bën jo pak përshtypje është ai i zëvendësministres së Turizmit dhe Mjedisit, Ornela Çuçi. Qytetarët që mbajtën dy protesta të mëdha kërkuan shkarkimin e dy ministrave atij të Brendshëm Bledi Çuçi dhe të Turizmit Mirela Kumbaro. Ata cilësohen si përgjegjës për vrasjen me skaf të 7-vjeçares Jonada Avdia, nga komisari i policisë Arjan Tase.
Kjo ngjarje tragjike ka shkaktuar zëmërim popullor, por në mbledhjen e fundit të qeverisë është diskutuar sesi t’i gjendet një vend pune Bibës dhe të shkarkohet një zëvendësministre, mjafton që të ketë mbiemrin Çcuçi, si Ministri i Brendshëm dhe të jetë zëvendëse në ministrinë e Kumbaros. Mashinisti i di këto punë!
