Nga Boldnews.al
Për të kuptuar se përse Ministri i Brendshëm, Bledi Çuçi, reagoi me shumë vonesë për tragjedinë e Potamit, ku mbeti pa jetë vogëlueshja Jonada Avdia, dhe u bë i gjallë publikisht vetëm kur u përfol si pronar skafesh, vjen në ndihmë Fletorja Zyrtare nr.111, e publikuar vetëm së fundmi, në 9 Gusht 2022.
Në tre urdhëra të njëpasnjëshëm, Bledi Çuçi ka urdhëruar delegimin e kompetencave të tij tek tre zëvendësministrat, për periudhën nga data 2 deri në 22 Gusht.
Pra, për të gjithë muajin, kreu i Ministrisë së Brendshme ka zgjedhur që të vijojë i pashqetësuar pushimet e tij, pavarësisht se situata me rendin dhe sigurinë e qytetarëve është në ditë shumë të vështira.
Natyrisht, Ministri i Brendshëm, ashtu si çdo person tjetër, ka të drejtë që të kryejë pushime vjetore.
Por, Ministri i Brendshëm, për shkak të specifikës së tij dhe përgjegjësive që ka marrë përsipër, është i detyruar që edhe të ndërpresë pushimet apo t’i shtyjë në kohë, kur roli dhe detyra e tij e kërkojnë që të jetë në krye të punëve.
Ngjarja tragjike e Potamit, ku një komisar policie vrau me mjet lundrues një të mitur 7-vjeçare ne bregun e Himarës nxiti indinjatën popullore dhe revoltën qytetarë për mungesën e sigurisë në Plazhe.
Gishti i përgjegjësisë u drejtua më së pari nga Policia e Shtetit, e cila është nomenklaturë e Bledi Çuçit.
Por, ky i fundit, atë ditë sapo kishte nisur pushimet dhe duket se as nuk ka pasur në mendje që të prishë terezinë e tij.
Me Urdhërin nr. 145, dt. 1 Gusht 2022, Bledi Çuçi delegoi kompetencat e tij tek zv. Ministri Besfort Lamallari, deri në 8 Gusht.
Në ditët që Lamallari mori kompetencat e Çuçit, në Himarë ndodhi tragjedia. Nga ministri i Brendshëm nuk pati asnjë reagim.
Ai do të ketë qenë në qetësinë e shezlongut dhe nuk e ka parë të arsyeshme të prishë rehatinë e pushimeve, qoftë edhe me një “cicërimë” në rrjetet sociale.
Në ditët në vijim, qytetarët u ngritën në protestë para zyrave të tij në Tiranë, ku kërkonin dorëheqjen e Çuçit për shkak të dështimit me masat e sigurisë.
Revolta popullore u përball me mos-kokëçarjen olimpike të Çuçit. Ai vijon i qetë pushimet e tij.
Me urdhërat nr. 146 dhe 147 të Ministrit të Brendshëm, po të datës 1 Gusht 2022, Çuçi i delegon kompetencat e tij për periudhën 9-15 Gusht dhe 16-22 Gusht 2022 zëvendësave të tij, Andi Mahila dhe Romina Kuko.
Pra, kushdo që mund të kërkojë Çuçin deri në 22 Gusht ose kushdo që pretendon se do t’i prishë “qetësinë” e pushimeve, e ka te tepërt.
