Albert Nasto, një nga pjesëmarrësit në takimin e zhvilluar pasditen e sotme me ekspertë të energjisë dhe hidrokarbureve, ku i pranishëm ishte edhe kreu i PD, Sali Berisha, tha se biznesi harxhon 50% të fitimit vetëm për të paguar energjinë elektrike
“Jemi vendim me karburantin më të shtrenjtë, 4-5 në botë. Janë gati 9 taksa mbi karburantin. Sot paguajmë gati 1260 lekë për litër karburant, gjë që nuk ndodh askund.
Në një kohë kaq të rëndë krize dhe dalje nga pandemia me forcat e veta të biznesit të vogël dhe të mesëm, nuk u bë asnjë favorizim. Në shumë vende u hoqën disa taksa dhe u stimulua biznesi me ndërhyrje direkte financiare. Në Shqipëri nuk e luajti kush as qerpikun, për çështjen e karburantit”, tha ai.
Sipas Nastos, me rritjen e karburantit u mbyllën mijëra biznese, u mbyllën edhe në pandemi me mijëra.
“Qeveria shqiptare vazhdon të tregohet indiferente me largimin e mijëra shqiptarëve. Një nga arsyet që janë mbyllur mijëra biznese sot, janë çmimi i karburanteve dhe i energjisë elektrike.
Sa paguajnë bizneset në Shqipëri? I kemi ndarë në 4 kategori biznesesh që paguajnë sot energjinë elektrike.
Kategoria e parë harxhon, çdo biznes, edhe ai i veshmbathjeve, paguan nga 1.8 deri në 2.6 milionë lekë për energjinë elektrike, në vit.
Në kategorinë e dytë fusim, bar kafet, restorantet, fast food, etj. Këta paguajnë nga 8 deri në 15 milionë lekë energji në vit.
Kategoria e 3-të e bizneseve paguan nga 15-25 milionë lekë në vit. Është një shumë e papërballueshme.
Kategoria e katërt paguan nga 30-60 milionë lekë në vit. Çdo biznes paguan qeverinë shqiptare.
Kategorinë kryesore e zënë bizneset, kafenetë, restorantet, fast-food, etj. 35 deri në 50 % të fitimit të tij, biznesi e paguan energji elektrike”, u shpreh ai.
