Nga Boldnews.al
Një shkëmbim parash ndërmjet Qeverisë dhe Bashkisë së Tiranës për Rindërtimin ngre hije dyshimi për një abuzim me vlerë rreth 2 milion euro.
Në 12 Korrik të këtij viti, Këshilli Bashkiak i kryeqytetit pranoi propozimin e kryebashkiakut Erion Veliaj për të ndryshuar buxhetin për vitin 2022.
Veliaj deklaroi në atë mbledhje se duhej pranuar një transfertë e pakushtëzuar e ardhur nga Qeveria “Rama”, në vlerë rreth 3.1 miliardë lekë të vjetra.
Kjo pagesë do të shërbente për të paguar Tatimin mbi Vlerën e Shtuar-TVSH-në, që Bashkia e Tiranës kishte si detyrim për projektin e Rindërtimit të tre objekteve arsimore në Kombinat, të zhvilluar me paratë e Fondit për Zhvillim të Katarit.
Qeveria Shqiptare dhe Fondi i Katarit nënshkruan një marrëveshje në Shtator 2020, në bazë të të cilës grupi i huaj do të rindërtonte shkollën “Lasgush Poradeci” në Kombinat, si edhe dy kopshte në Pezë, për një vlerë prej 5 milion dollarë.
Në bazë të kursit të këmbimit të Bankës së Shqipërisë në atë kohë, një dollar ishte i barabartë me 104 lekë. Pra, shpenzimi i Fondit të Katarit llogaritej në 5.2 miliardë lekë të vjetra.
Sipas Marrëveshjes, përfituesi fundor, Bashkia e Tiranës, detyrohej që të paguante Tatimin mbi Vlerën e Shtuar për mallrat e produktet e nevojshme, i cili në Republikën e Shqipërisë është 20 përqind e vlerës së investimit.
Bashkia e Tiranës detyrohej që të paguante 20 përqind të vlerës 5.2 miliardë lekë të vjetra, ose rreth 1.05 miliardë lekë të vjetra.
Por, në vendimin e Këshillit Bashkiak nr. 64 të datës 12 Korrik 2022, është miratuar një fond rreth 3.1 miliardë lekë të vjetra.
Kjo shumë është mbi 2 miliardë lekë të vjetra më shumë ose rreth 2 milionë euro, duke ngritur dyshime për abuzim të madh.
Fondi i Katarit përfundoi rindërtimin e objekteve arsimore në fund të vitit 2021 dhe ceremonia e përurimin u drejtua nga Kryeministri Edi Rama e kryebashkiaku Veliaj.
Përfundimi i godinave të reja ka ndodhur disa muaj përpara sulmit të Rusisë mbi Ukrainën dhe ky detaj zhvlerëson çdo justifikim të mundshëm se vlera mallrave të ndërtimit e rrjedhimisht edhe e TVSH-së për objektet e reja është rritur për shkak të ngritjes së çmimeve globale si pasojë e konfliktit të armatosur në kufijtë e Europës.
