Kreu i Aleancës për Ardhmërinë e Kosovës, Ramush Haradinaj, ka kritikuar kryeministrin Albin Kurti, i cili ka shtyrë deri më 1 shtator implementimin e vendimeve për reciprocitetin me Serbinë, për letërnjoftimet dhe targat.
Duke iu drejtuar kryeministrit, ai tha se është bërë “good guy” dhe se po vepron vetëm si e urdhëron Bashkimi Evropian.
“Kurti me të vërtetë është good guy (djalë i mirë). Por, është një problem këtu. Sikur të ishte nisur si good guy s’do të kishte dert. Por, është nisur si i fortë. Ja ku ka përfunduar. Shko para, shko mbrapa. Vetëm çfarë t’i thonë. Dhe a e dini kush? Lajçaku. Sepse atë e thërret Vuçiçi. Kjo është Kosova sot”, u shpreh Haradinaj.
Ai më tej tha se Kosova ka hyrë në “qorrsokak” dhe se për të dalë nga aty, “Kurti duhet t’i kryejë së pari detyrat e shtëpisë”.
“A do të zgjidhet kështu situata në veri? Ky është qorrsokak ku kemi hyrë. Për të dalë duhen kryer punët e shtëpisë. Duhet të rrisim rrogat e policëve që po i çon në veri. Jepu shtesa, bleju çfarë ju duhet. Shtatori vjen shpejt e është turp, Kosova sa herë të niset që të kthehet mbrapa”.
Sipas tij, me qeverisjen e Vetëvendosjes, është hera e parë kur Kosova kthehet mbrapa në veri.
“Vetëm me qeverisjen e VV-së jemi kthyer mbrapa në veri, kurrë më herët. Më mirë është mos me u nis hiç. Imagjino sot më të respektuar janë serbët në veri se sa ti kryeministër, se për ty vendos tjetër kush. Tashmë në Bruksel, ku është ftuar takimi do të diskutohet për diçka që s’duhej të diskutohej fare – për reciprocitetin. Më mirë është të shkosh në Uashington dhe të përfundojë marrëveshjen finale me Serbinë”.
