Pas Stresit, ka reaguar edhe Don Xhoni lidhur me situatën e tensionuar, që është krijuar në Veri të Kosovës mbëmjen e 31 korrikut.
Reperi nga Drenica, emri i vëretetë i të cilit është Xhonatan Isufi, ka postuar një foto të ushtrisë së Kosovës krahas së cilës shkruan: Zot shtëpie këtu ka pasur që nga ekzistenca!
Kujtojmë se edhe Stresi ka reaguar në lidhje me situatën e krijuar mes forcave serbe dhe atyre të Kosovës, në veri. Me anë të një statusi në InstaStory, Stresi u shpreh se kërcënimi serb po bëhet për popullin e Kosovës. Ai i ka bërë thirrje të gjithë shqiptarëve që të bëhen bashkë dhe ta mbështesim Kosovën pasi jemi një gjak.
Madje reperi u shpreh se është gati të sakrifikojë dhe jetën e tij për ta mbrojtur atë.
Çfarë ndodhi në veri të Kosovës?
Ditën e djeshme (31 korrik) disa protesta kanë ndodhur në veri të Kosovës, ku janë vendosur barrikada nga serbët lidhur me kundërshtimin e vendimit për pajisjen me fletëdeklarim dhe zëvendësim të targave me ato të republikës së Kosovës.
Qeveria e Kosovës kishte paralajmëruar se që nga 1 gushti, do të niste zbatimi i reciprocitetit me Serbinë për targat dhe letërnjoftimet.
Mirëpo një ditë para se ky vendim të hynte në fuqi, serbët lokalë në veri të vendit filluan kundërshtimet e tyre duke vendosur barrikada në rrugët që çojnë në dy pikë kalimet kufitare me Serbinë – Jarinje dhe Bërnjak.
Përveç barrikadave në veri pati edhe të shtëna me armë zjarri të cilat u konfirmuan edhe nga Policia e Kosovës, e disa qytetarë edhe u keqtrajtuan në kufi.
Qeveria tha se do të shtyjë zbatimin e vendimeve për lëshimin e dokumenteve për hyrje-dalje për shtetasit e Serbisë që hyjnë në Kosovë dhe atë për ndryshimin e targave serbe, kur të hiqen bllokadat.
