Nga Boldnews.al
Admir Abrija, kreu i ri i Drejtorisë së Përgjithshme të Burgjeve, është i “fiksuar” pas të dënuarëve! Jo të atyre që ka aktualisht në qeli, por ata që kanë qenë. Madje, janë dënuar për falsifikime dhe janë arrestuar për korrupsion me tendera. Por, duket se ditët në qeli i kanë bërë më të kthjellët, pasi kanë arritur të “rekrutojnë” edhe Drejtorin e Përgjithshëm të Burgjeve. Pak ditë më parë, BoldNews.al publikoi dokumentet e një tenderi që kishte fituar Sokol Topçiu, pronari i firmës “Farmanet”, i cili disa muaj më parë u arrestua për ilaccet e COVID 19, por që kishte arritur të fitonte miliona euro para publike. Ndërkohë, disa muaj më pas, fitoi një tender 550 mijë euro nga Burgjet. Pra, nga qelia te tenderat, kësaj herë nga vetë “pronarët” e qelive! Por, Admir Abrija ka vijuar që t’u japë tendera firmave me probleme ligjore, apo të pronarëve të arrestuar dhe dënuar për korrupsion me këto procedura.
Sipas dokumenteve që disponon BoldNews.al, Drejtoria e Përgjithshme e Burgjeve ka shpallur fitues firmën “SINANI TRADING” për një tender emergjent ushqimesh në burgje. Por, kujtojmë se firma “SINANI TRADING” shpk, apo ish “Kurti”, është ndaluar disa vite të marrë pjesë në tendera, pasi ish-pronari i saj, Shemsi Sinani, babai i pronarit akual Ledion Sinani, rezulton i dënuar me 4 vite burg për falsifikime, mashtrime e korrupsion në tenderët ushqimorë të burgjeve. Madje, ka dyshime se furnizonte me ushqime të skaduara këto burgje.
Në dokumentet e siguruara nga redaksia jonë rezulton se kjo firmë, tashmë me emrin “SINANI TRADING”, ka vazhduar të fitojë tendera nga Drejtoria e Burgjeve, madje me procedurën “me negocim, pa shpallje të njoftimit të kontratës”. Bëhet fjalë për tenderin me objekt “blerje bulmet dhe nënprodukte të tij për nevoja emergjente të DPB, për të dënuarit në IEVP-të”. Fondi për këtë tender edhe 54 milionë lekë të reja, ose rreth 500 mijë euro. Burgjet, ccuditërisht kanë bërë tender emergjent për 171 mijë kg qumësh, 19 mijë e 800 kg gjalpë, 30 mijë e 384 kg djath dhe 27 mijë kg kos. Mësohet se afati i ekzekutimit është 6 muaj nga data e nënshkrimit të kontratës, ndërsa në këtë procedurë ka marrë pjesë vetëm firma “SINANI TRADING”. Madje, drejtuesit e burgjeve kanë negociuar me këtë firmë. Procedura është tepër e dyshimtë, pasi kujtojmë se ish-drejtuesit e Burgjeve janë vënë shpesh herë nën akuza për korrupsion. Madje, ish-drejtori Artur Zoto u arrestua, ndërsa të tjerët janë hetuar. Po Abrija, i cili duket se ka një “fiksim” për të burgosurit?!
BoldNews.al hulumtoi dokumentet e Qendrës Kombëtarë të Biznesit për këtë firmë. Rezulton se “SINANI TRADING” më parë është quajtur “Kurti”. Dhe, drejtohej nga z.Shemsi Sinani. Nëse do të kërkosh për këtë emër, në prokurori dhe në polici, do të zbulohet se ai ka qenë i arrestuar bashkë me disa punonjës të burgjeve. Por, firma oas viti 2018 ndryshoi emër dhe ka si administrator djalin e Shemsiut, Ledionin. Ora, nga babai i dënuar te djali, që po mundohet të “pastrojë” emrin e familjes me miliona të fituara po nga burgjet, atje ku babai i tij ka bërë “pis”.
