Partia Socialiste ka ndërmarrë një nismë ligjore për ndryshimin e ligjit për dosjet e ish-Sigurimit të Shtetit.
“Rastet flagrante dhe shqetësuese të pasqyruara në shkresën informuese të Autoriteti drejtuar Kuvendit, ku figura të rëndësishme të shtetit të pajisur me certifikatën e pastërtisë së figurës, në fakt rezultojnë në dokumentet e krijuara të ish-sigurimit të shtetit. Kërkoj një reagim dhe adresim të menjëhershëm, transparenca e plotë për këto raste, duhet kryhet dhe pengesat apo boshllëqet në legjislacionin ekzistues duhet të adresohen me qëllim zbardhjen e së vërtetës, si përgjegjësi për brezat e ardhshëm”, u shpreh në një deklaratë për mediat kryetarja e Komisionit të Ligjeve, Klotilda Bushka.
“Transparencë e plotë për këto raste duhet të kryhet dhe pengesat apo boshllëqet në legjislacionin ekzistues duhet të adresohen me qëllim zbardhjen e të vërtetës sipas vlerave demokratike të drejtësisë si përgjegjësi për brezat e ardhshëm por mbi të gjitha detyrim për ata që vuajtën nën regjimin e kaluar. Dy nismat tona ligjore konsistojnë në krijimin e shtratit ligjor për verifikimin e subjekteve pavarësisht nëse kanë ose jo një certifikatë të mëparshme pastërtie nën dritën e fakteve dhe të vërtetës si dhe për verifikimin e të gjitha subjekteve që zgjidhen apo emërohen në poste publike mbi pastërtinë e figurës së tyre”, shtoi ajo.
Një ditë më parë, Partia e Lirisë i kërkoi Kryetares së Kuvendit informim mbi përmbajtjen e dokumenteve që Autoriteti i Dosjeve ka dorëzuar në Parlament për ish-Presidentin Ilir Meta. Sipas dokumenteve të Autoritetit, emri i ish-Presidentit rezulton në dosjet e ish-Sigurimit të Shtetit si bashkëpunëtor.
Ndërkohë autoriteti kërkon që Prokuroria të zbardhë se kush është personi që vuri në lëvizje institucionin nëpërmjet e-mailit anonim në adresën e kryetares së këtij institucioni, Genta Sula.
Nga ana tjetër, Ilir Meta ka mohuar në mënyrë kategorike se ka bashkëpunuar me ish-Sigurimin dhe ka paralajmëruar Autoritetin e Dosjeve se do mbajë përgjegjësi ligjore për manipulimin që sipas kreut të Partisë së Lirisë, po bëhet me emrin e tij.
