Një i plagosur rëndë dhe një viktimë, është bilanci i atentatit që ndodhi mbrëmjen e sotme në qendër të qytetit të Laçit.
Viktima është identifikuar si Klisman Preçi, 27 vjeç, i cili mbërriti në spitalin e Traumës në Tiranë, pa shenja jete.
Ndërkohë Ylli Brahimi, 47 vjeç, ndodhet në një gjendje të rënduar shëndetësore, me plumba në kraharor dhe këmbë.
Brahimi dhe Preçi po udhëtonin me një automjet ‘Land Cruiser’ me targa të Shkupit, kur drejt tyre është hapur zjarr me breshëri kallashnikovi.
Zona ku ka ndodhur atentati është e ndriçuar dhe e monitoruar nga kamerat, çka mund të çojë në identifikimin e autorëve të ngjarjes së rëndë.
Pak minuta pas atentatit të ndodhur në qendër të Kurbinit, një automjet, që dyshohet se është përdorur nga atentatorët, është gjetur duke u djegur në një fshat po të Kurbinit. Brenda automjetit që po digjet është gjetur edhe një automatik, që ndoshta është përdorur nga atentatorët në ngjarjen e rëndë.
Personat ndaj të cilëve u qëllua me breshëri automatike ishin emra të njohur për policinë, ndërsa më parë ata i kishin shpëtuar atentateve të organizuara kundër tyre.
