Eksperti i IT Gentian Progni komentoi në në Syri Tv sulmet kibernetike ndaj e-Albania. Progni deklaroi se kemi të bëjmë me një sulm të paprecedentë.
Ai theksoi se ky sulm ka ardhur nga Irani pasi është lënë një mesazh politik në virusin e shpërndarë në rrjet. Sipas Prognit mesazhi është ‘pse duhet të harxhojmë ne miliona euro taksa për terroristët e Durrësit.’
“Mendoj se lidhet me kampin e Manzës, mendoj se fshihet shteti i Iranit. Hera e parë që ndodh në Shqipëri. Ju ka ndodhur dhe vendeve më të forta se Shqipëria dhe nuk është e thënë t’ia kalosh paq.
S’ka pasur një dëmtim kolosal të dhënash. Për fat të mirë kanë funksionuar back-up-et. Duhet marrë më seriozisht siguria.”-tha Progni.
Më tej ai theksoi se këtë radhë kishim një sulm të dyfishtë, i pari për kopjimin e të dhënave dhe i dyti për të hequr vëmendjen nga sulmi i parë.
“Gjatë të njëjtës kohë kur u bë sulmi me virus që kopjon të dhënat, kishte dhe një sulm tjetër DDoS për të hequr vëmëndjen nga sulmi i parë.
Sulmi DDoS është një sulm që në një sekond dërgon kërkesa të pafundme, ose kërkesat më të mëdha se sa përballon një server, prandaj ranë disa faqe.
Sistemet kur ndërtohen, nëse harxhojmë 200 mln euro për të ndërtimin e një sistemi, duhen 400 mln për sigurinë e tij.
Investimet në AKSH janë me DSIK, di që janë investuar shumë para, por nuk mund ta them qartazi që kemi investuar sigurinë.”-tha Progni.
