Jo vetëm drejtuesit e Dhomave të Tregtisë, por edhe diplomatët e atashuar në Tiranë, kanë shprehur kritika dhe dyshime lidhur me projektin e Kryeministrit Edi Rama, për amnistinë fiskale.
Pas ambasadorëve të Francës dhe Gjermanisë, dyshime të forta lidhur me amnistinë fiskale ka shprehur edhe ambasadori i Britanisë së Madhe.
Dyshimet e shprehura deri më tani nga diplomatët, drejtuesit e organizmave ndërkombëtare financiare dhe ato të Dhomave të Tregtisë që operojnë në vend, kanë të bëjnë me mundësinë që mund të kenë grupe apo individë kriminalë, për të pastruar paratë, ndërkohë që drafti parashikon deri në 2 mln euro.
Ambasadori britanik Alastair King-Smith tha në një intervistë për Tv Klan se ka pasur diskutime të shumta me qeverinë shqiptare.
“I kemi dëgjuar me shumë kujdes, përfshirë Kryeministrin dhe zyrtarë të tjerë të qeverisë. Gjithashtu dhe politikanë të ndryshëm dhe përfaqësues të shoqërisë civile. Ka një sërë shqetësimesh dhe mendoj se Mbretëria e Bashkuar ndan këto shqetësime me partnerët e saj ndërkombëtarë, si Bashkimi Europian.
Ne jemi të shqetësuar veçanërisht për mënyrën se si masa të tilla mund të shfrytëzohen nga kriminelët apo grupet kriminale për qëllime të ndryshme.
Nuk është mbi bazën e principeve të amnistisë fiskale sepse në një mënyrë apo në një tjetër mund të ketë një ndikim pozitiv, por nga ana negative është se a mund të bëhet diçka e tillë duke shmangur kriminalitetin dhe problemet që masa të tilla sjellin. Këto janë problemet që kemi në diskutimet e tanishme dhe do të vijojmë bisedimet mbi këtë çështje për t’u siguruar se nuk do të ketë impakt
Ne jemi me të vërtetë të shqetësuar për momentin, se propozimi aktual nuk do të shmangë problemet që fola pak më parë dhe situata mund të shfrytëzohet”, tha King-Smith.
Nuk dihet nëse Kryeministri Edi Rama do i qëndrojë deri në fund deklaratave që ka thënë për të miratuar draftin, edhe pse në Kuvendin e Shqipërisë nuk i ka votat e nevojshme për miratimin e një ligji të tillë, i cili kërkon shumicë të cilësuar. Gjithsesi në kushtet kur opozita po operon me disa grupimeve parlamentare, ndoshta ai nuk do e ketë të vështirë të peshkojë votat e deputetëve përtej grupimit PS-PSD që ka në total 77 vota.
