Anëtari i Këshillit Kombëtar të PD, Fatbardh Kadilli, kritikon deputetët e pavendosur të Partisë Demokratike, pas takimit që ata zhvilluan mbrëmjen e kaluar.
Në Task Force në Syri Tv, Kadilli tha se deputetët duhet të tregohen parimorë dhe në emër të parimeve duhet të bashkohen, por jo për interesa karrieriste të tyre personale.
“6 marsi ka qenë një mësim për të gjithë, edhe për pjesën e Berishës dhe atë të Bashës. Grupi Parlamentar është një grup i dizenjuar nga Basha, është shprehje e vullnetit të Bashës.
E kanë ndjekur nga mbrapa sepse kanë ndjekur bamirësin e tyre, nuk kanë ndjekur parimet politike.
Sot po reflektojnë real politikën, por jo parimet. Nuk e kuptoj pse lëvizin nga njëri krah, në tjetrin. Nëse kanë parimin që i kanë ndarë nga Berisha, nuk kanë lidhje me Bashën. Nëse i ka ndarë fakti që kanë ndjekur bamirësin e tyre, prandaj s’kanë shkuar te Berisha, është çështje e karrierës së tyre që s’më intereson. Mua më intereson një gjë, kanë marrë një mandat nga qytetarët dhe atij mandati t’i përgjigjen me seriozitet, jo me, ‘s’na doli mirë këtej, hajt të hidheni andej’. Unë do të doja të mbanin qëndrime parimore jo sot, por që ditën që partia hyri në krizë.
Nuk dëgjova asgjë parimore, ai ka numrat, hajt të shkojmë te numrat. Ata e kanë ditur nga po anon shumica e partisë që në tetor-nëntor, e panë në 11 dhjetor, por nuk pashë reagim të tillë. Sepse në Shqipëri ndiqet lideri që të bën deputet.
Pse nuk e mbylli kapitullin Basha në 25 prill 2021 kur unë i parë denoncova dhe thashë do të jap dorëheqjen dhe këta mu hodhën mua në fyt. Pse? Sepse nuk ndjekin parimet. Shumë më tepër kur bashkohen në emër të një parimi, por dua parimet, jo ‘m.q.s po vijnë zgjedhjet, tani të shkojmë atje’. Pse? Që të sigurojnë karrierën e tyre? Vazhdimësinë e tyre? Kanë mandatin e 620 mijë shqiptarëve dhe duhet të ngrihen në lartësinë e 620 mijë votave”, tha Kadilli.
