Kreu demokrat, Sali Berisha, tha se Kryeministri Edi Rama shkoi në Bruksel si monist dhe u kthye po si i tillë.
Gjatë takimit me demokratët dhe qytetarët durrsakë, Berisha tha se do të shkonte edhe ai nëse do të kishte një ftesë, por shtoi se nuk do të shtrëngonte duart me Edi Ramën.
“Po të më ftonte do të shkoja, do të shkoja për të përfaqësuar demokratët shqiptarë, por ua them se nuk do të kishte asnjë shtrëngim duarsh me mua, dhe aq më shumë qepalla”, tha Berisha.
“Do ju tregoj një gjë nga historia, por të vërtetë. Nga viti ’86, qeveria hungareze dhe qeveria rumune, zhvillojnë tratativa të fshehta me Brukselin për t’i pranuar në BE. Brukseli u përgjigj, jo, tha, ju nuk mund të pranoheni sepse jeni në sferën e Bashkimit Sovjetik. I vetmi vend, e thanë në konfidencë, nga ish-komunistët që mund të pranohet është Shqipëria…por Shqipëria ishte armik me të gjithë botën. Nuk ka dyshim që ky shkoi si monist në Bruksel. Ndaj unë e kam shpallur atë armik të lirisë së shqiptarëve.
Natyrisht, po të ftonte do shkoja. Por ta harrojë se do të kishte shtrëngim duarsh me mua. Nuk mund të ndodhte kurrë ajo. Do të shkoja për të përfaqësuar ju, aspiratat demokratike të shqiptarëve. Pra, shkoi si monist, u kthye si monist. Natyrisht me dosjen në shpinë të inceneratorëve, me dosjen e Portit të Durrësit”, tha ai..
