Bleona Tafallari u dënua me 3 vjet e 4 muaj burgim në shkallën e parë, megjithatë prokurori kishte kërkuar pesë vite dënim.
Vajza 20-vjeçe nga Kosova, por me vendbanim në Milano, ishte arrestuar nga autoritetet italiane në nëntor të vitit të kaluar nën dyshimet për lidhjet e saj me terrorizmin. Ajo u dënua për nxitje të pjesëmarrjes në terrorizëm.
Por, gjykatësi pranoi se nuk kishte prova të mjaftueshme për të vërtetuar nëse kosovarja ishte pjesë e ndonjë organizate terroriste, as e ISIS-it dhe as e grupeve të tjera. Të kënaqur mbetën avokatët e saj, të cilët pohuan se kishin kërkuar rikualifikimin e akuzës.
Kur ishte arrestuar Bleona Tafallari, gazetat atje shkruanin se vajza është rritur në Itali në një familje kosovare në Isernia, derisa thuhej se radikalizimi i saj kishte ndodhur qysh në moshën 16 vjeçare duke shfrytëzuar kompjuterin.
Në bisedat e saj ajo thotë se familjarët kanë tentuar t’ia heqin nikabin, por që thotë se s’kishin pasur sukses.
