Një Gjykatë në Dublin vendosi të lërë në burg 27-vjeçarin shqiptar, Ndriçim Qema, i cili akuzohet për drejtimin e një bande që trafikonte emigrantë të paligjshëm në Britaninë e Madhe kundrejt pagesës 10 mijë Euro.
27-vjeçari mësohet se ka shkuar në Irlandë në vitin 2018 ku ka kërkuar azil, por tashmë është dënuar për drejtimin e një rrjeti trafiku njerëzish.
Sipas mediave irlandeze, fillimisht ai punoi si kontakt me bandat irlandeze dhe më pas i raportonte të atit në Shqipëri, i cili sipas mediave të huaja është me precedentë të mëparshëm penalë.
Qema ishte specializuar në falsifikim dokumentash dhe pastrim parash. Për çdo shqiptar që kalonte në Mbretërinë e Bashkuar përmes Irlandës paguanin mes 5 mijë deri në 10 mijë Euro dhe merrnin dokumente false.
Skema që ndiqej ishte e thjeshtë. Personat që do të trafikoheshin kundrejt shumave që paguanin, pajiseshin me dokumente false italiane, të cilat i hidhnin sapo mbërrinin në Dublin. Më pas ata aplikonin për azil.
Të njëjtët persona akomodoheshin në hotel, nga ku më pas kontaktoheshin nga 27-vjeçari shqiptar që i merrte dhe i pajiste me dokumente të reja të falsifikuar dhe udhëtonin drejt Britanisë.
Ai u arrestua në shtator 2019 teksa po tentonte të udhëtonte nën dokumente të rreme me një tjetër shqiptar. Qema ishte dëbuar më parë nga Britania e Madhe.
Kur telefoni i tij u gjet në një makinë të parkuar në aeroportin e Belfast, u zbulua edhe rrjeti i trafikut. Telefoni përmbante 30 foto të letrave false të identitetit si dhe mesazhe mes Qemës dhe babait të tij në Shqipëri.
Gjithashtu kishte edhe një mori mesazhesh mes Qemës dhe njerëzve në Shqipëri që kërkonin të shkonin në Irlandë.
