Tre persona kanë humbur jetën në një atentat të mirëorganizuar, ndërsa automjeti ku ata udhëtonin u qëllua me breshëri automatike. Dy nga viktimat mësohet se kanë mbetur në automjet, i cili është përfshirë nga flakët, ndërsa viktima e 3-të është qëlluar teksa ka dalë nga automjeti në një tentativë për të shpëtuar.
Sipas të dhënave të para, automjeti mbi të cilin është qëlluar i përket një shtetasi nga zona e Fushë Kuqes në Kurbin, por nuk dihet nëse pronari i automjetit ndodhej ose jo në makinë.
Bazuar në të dhënat e para, raportohet se ndaj automjetit ku ndodheshin viktimat, është qëlluar nga një tjetër automjet, i cili ka ecur paralelisht me atë të viktimave, duke qëlluar me breshëri. Grupi hetimor ka gjetur së paku 50 shenja plumbash në automjetin e viktimave. Mendohet se në atentat kanë marrë pjesë së paku dy persona, ndërsa është përdorur një armë kallashnikov.
Atentati me armë ka ndodhur pranë Urës së Fushë Krujës. Referuar të dhënave të deritanishme dyshohet se autorët mund ti kenë vënë zjarrin automjetit për të humbur gjurmët, ndërsa dy trupat e gjetur në automjet janë pothuajse të dekompozuar për shkak të djegies.
Një nga viktimat është identifikuar si Diklen Vata, 30 vjeç nga Laçi, ndërkohë që nuk ka të dhëna për dy viktimat e tjera. Mendohet se 30-vjeçari ishte objektiv i atentatit, ndërsa ai ka tentuar të largohet nga automjeti. Nga raportimet mësohet se Vata është arrestuar më parë për trafik droge, ndërkohë që vitet e fundit ndodhej jashtë Shqipërisë.
Diklen Vata është arrestuar nga policia e Tiranës në vitin 2017, kohë kur zyrtarisht u tha se ai u kap me disa doza kokainë fshehur në çorape dhe në çelësat e makinës.
Policia njoftoi se “më datë 27.09.2017 arrestoi shtetasin Diklen Vata, 25 vjeç, banues në Laç. Gjatë kontrollit fizik të ushtruar ndaj këtij shtetasi tek zona e shkollës “Bajram Curri”, i është gjetur e fshehur në çorape një mbështjellëse me kokainë si dhe 3 mbështjellëse të tjera të fshehura në çelësat e makinës”.
“Në vijim është ushtruar kontroll në banesën e shtetasit Diklen Vata, ku gjatë kontrollit të ushtruar i janë gjetur dhe 18 mbështjellëse të tjera me lëndë narkotike kokainë.
Janë sekuestruar në cilësinë e provës materiale 22 doza me lëndë narkotike e dyshuar e llojit kokainë e cila rezultoi e peshës 11.4 gramë, 3 aparate celularë, mjeti i markës “Rover”.
Materialet iu referuan Prokurorisë së Rrethit Gjyqësor Tiranë në ngarkim të shtetasit të lartpërmendur për veprën penale ” Prodhim dhe shitja e lëndëve narkotike””, njoftonte në atë kohë policia.
Ndërkohë, rreth 3 km larg vendit të atentatit, në zonën e Arramenasit, është gjetur një automjet duke u djegur, i cili dyshohet se i përket autorëve të ngjarjes.
Nga të dhënat e deritanishme rezulton se dy nga viktimat kanë mbetur të vrarë brenda automjetit, ndërsa jashtë automjetit ndodhet viktima e 3-të. Dyshimet janë se një nga viktimat është e seksit femër.
Sipas raportimeve, ndaj automjetit ku ndodheshin viktimat është qëlluar me të paktën 50 plumba dhe më pas automjet është përfshirë nga flakët.
Ndërkohë që në zonën e Arramenasit, 3 km nga vendi i atentatit, është gjetur duke u djegur një automjet, i cili dyshohet se mund të jetë përdorur nga autorët në atentatin ku kanë mbetur të vrarë 3 personat.
