Tre efektivë të Forcës së Posacme “Shqiponja” në Durrës janë pezulluar nga detyra pasi akuzohen se kanë ushtruar dhunë ndaj një personi që shoqëruan.
Ka qenë vetë A. K., i shoqëruar nga efektivët Blerta Gjergji, Harrun Hysenaj dhe Rezart Hajdaraj që ka kallëzuar rastin dhe menjëherë më pas kanë nisur hetimet nga Agjencia e Mbikqyrjes Policore.
Tre efektivët dyshohet se kanë kryer veprën penale,” Kryerja e veprimeve arbitrare”.
Dhuna pretendohet se ka ndodhur më 6 nëntor të vitit 2021, kur ka qëndruar në dhomat e sigurisë, është dhunuar nga efektivët që e kishin shoqëruar.
Drejtoria Rajonale e AMP Durrës njofton se ka zbatuar urdhrin e Prokurorisë për ekzekutimin e vendimit të Gjykatës së Shkallës së Parë Durrës, e cila ka caktuar masën e sigurimit personal me karakter ndalues “Pezullim i ushtrimit të një detyre a shërbimi publik” ndaj tre efektivëve të Drejtorisë Vendore të Policisë Durrës.
Me vendim të Gjykatës së Shkallës së Parë Durrës janë pezulluar plotësisht nga ushtrimi i detyrës punonjësit e policisë:
- Inspektore Blerta Gjergji, me detyrë Trupë Shërbimi në Sektorin e Forcës së Posacme “Shqiponja” në DVP Durrës.
- Inspektor Harrun Hysenaj, me detyrë Trupë Shërbimi në Sektorin e Forcës së Posacme “Shqiponja” në DVP Durrës
- Inspektor Rezart Hajdaraj, me detyrë Trupë Shërbimi në Sektorin e Forcës së Posacme “Shqiponja” në DVP Durrës.
Hetimet ndaj punonjësve të mësipërm janë zhvilluar nga Drejtoria Rajonale e AMP-së Durrës, pas kallëzimit të kryer nga shtetasi A. K., mbi dyshimet për kryerjen e veprës penale “Kryerja e veprimeve arbitrare”, sqaron AMP.
“Nga veprimet hetimore ka rezultuar se shtetasi A.K. është shoqëruar më datë 06.11.2021 dhe gjatë kohës që ka qëndruar në dhomat e sigurisë, punjonjësit e policisë të mësipërm kanë ushtruar dhunë ndaj tij, veprime arbitrare që evidentohen edhe nga këqyrja e pamjeve filmike të ambienteve të sigurisë së DVP Durrës”, thuhet më tej në njoftim.
