Kryeministri Rama, ministrja Ibrahimaj, guvernatori Sejko dhe ekspertë të fushës prezantuan projektligjin për Amnistinë Fiskale i cili do të zgjasë 9 muaj.
Delina Ibrahimaj shpjegoi se kjo amnisti është e para e këtij lloji, e plotë, duke qenë se të tjerat kanë qenë të pjesshme dhe kanë pasur qëllim vetëm faljen e detyrimeve tatimore.
“Ky projektligj ka një sërë avantazhesh. Ai propozon që ne të diskutojmë dhe analizojmë premisat. Synon të ketë një afat 9 mujor zbatimi. Subjektet janë individë, janë edhe individë rezidentë tatimorë edhe nëse nuk janë shtetas shqiptar. Është parashikuar një kufi prej 2 milion eurosh”, tha Ibrahimaj.
“Në zbatim të këtij ligji te tatimet do të krijohet një zyrë e njësisë fiskale. Kjo zyrë do të analizojë të gjitha kërkesat që do të vinë nga subjektet. Në përfundim të afatit 5 ditor administrata do të jap një vërtetim nëpërmjet të cilët subjektet do ti drejtohen për të paguar një normë tatimore. Është 7% për katër mujorin parë dhe 10% për të dytin. Në përfundim administrata tatimore do të japë një certifikatë ku do të jenë legalizuar këto para apo asete”, shtoi ministrja e Financave.
Ajo sqaroi se synimi i Amnistisë Fiskale është rritja e kapitalit për shkak të krizës ekonomike.
Nga ana tjetër, për nismën ka pasur kundërshti nga dhomat e huaja tregtare dhe opozita. Kryetari i PD-së Sali Berisha theksoi sot se qeveria me këtë projektligj, synon legalizimin e parave të krimit.
