Partizani ka zbritur me gjithë artilerinë e rëndë në fushën e stadiumit “Air Albania” për të përgatitur seancën e fundit për ndeshjen e kthimit me Saburtalon.
Kurthi i të kuqve për kundërshtarin nisi që nga grupi i lojtarëve që zbritën në fushë, pasi bënin pjesë edhe lojtarë që nuk do të jenë të grumbulluar për këtë takim.
Normalisht me grupin u përgatit dje edhe kapiteni Alban Hoxha, i cili nuk është i federuar për këtë raund, apo venezuelasi Aristotelo Romero, që klubi nuk e mori me vete në Gjeorgji, por e la të bënte vrap nga Kodrat e Liqenit.
Edhe pse me gjithë atë ushtri që zbritën të kuqtë në seancën e fundit, trajneri Dritan Mehmeti është i predispozuar që të mos bëjë ndryshime në formacion, aq më shumë që ajo përbërje doli triumfuese para një jave në Gjeorgji.
Edhe pse trajneri pohoi se nuk është i limituar në zgjedhje, duhet pranuar që për momentin, alternativat nuk janë në stadin e titullarëve që fituan në ndeshjen e parë.
Partizani e pret Saburtalon me luksin e avantazhit të 1-0 dhe gjasat janë që “demat” të ndjekin të njëjtën taktikë, duke u mbrojtur mirë dhe përfituar nga hapësirat që do të lënë gjeorgjianët, të cilët janë të detyruar të luajnë në sulm dhe të kërkojnë golin sa më shpejt.
Mbrojtja dha sinjale pozitive në Gjeorgji duke u bërë ballë sulmeve të gjeorgjianëve dhe kjo gjë kërkohet edhe sot nga të kuqtë.
Paraprakisht, stafi teknik i ka llogaritë me të njëjtën përbërje.
Pjesa e “kurthit” që pritet të funksionojë te Partizani ka të bëjë kryesisht me kundërsulmin e shpejtë, ku kësaj radhe pritshmëritë janë te Skuka, shpërthimet e të cilët janë më shumë se kurrë të nevojshme.
Barrë të madhe në këtë takim do të ketë edhe për treshen e mesfushës, ku Rrapaj, Matondo dhe Murataj, nëse nuk bëhet ndonjë modifikim në minutat e fundit, kanë për të detyrë që të bëhen barriera e parë për sulmet e kundërshtarëve dhe t’i japin gjeometri fazës sulmuese të “demave” të kuq ndaj Saburtalos.
Formacioni i mundshëm:
4-3-1-2: Teqja; Hadroj, Bitri, Belica, Atanaskoski, Rrapaj, Matondo, Murataj, Skuka, Hoti, Cara
