“Eneo Bitri do të largohet nga Partizani pas pjesëmarrjes së ekipit të kuq në Kupat e Europës”, kështu ka deklaruar Ermal Tahiri në panelin e emisionit “Skaner”. Në rolin e analistit, ai ka shpjeguar se klauzola në kontratë e lejon qendërmbrojtësin të largohet i lirë në rast të ndonjë oferte joshëse nga jashtë vendit.
Disa ditë para sfidës së Partizanit kundër Saburtalos, vjen kjo deklaratë e fortë për një nga futbollistët më të rëndësishëm të prapavijës së kuqe. Kujtojmë që Newsport.al raportoi para disa ditësh se Hapoel Tel Aviv ishte ekipi që interesohej për shërbimet e tij. Madje i kishte bërë ofertë zyrtare. I ndodhur në këto kushte, nuk do të ishte çudi që beratasi t’i jepte lamtumirën të kuqve menjëherë pas ndeshjeve të Europës.
