Kreu demokrat Sali Berisha do të zhvillojë pasditen e sotme dy takime të njëpasnjëshme me strukturat e Partisë Demokratike. Takimin e parë, sipas raportimeve, Berisha e ka me anëtarë të Kryesisë dhe deputetë demokratë, ndërsa në orën 18:30 do të takohet me drejtuesit e degëve të PD në Tiranë.
Takimet e Berishës vijnë pak ditë pas protestës së 7 korrikut, e cila është konsideruar si një nga më të mëdhatë që kjo parti ka organizuar, referuar këtu edhe periudhës kur u mbajt, ku temperaturat shënonin mbi 36 gradë celcius.
Mijëra qytetarë iu bashkuan kauzës për shpëtimin e Shqipërisë, ndërsa u kërkua largimi i Edi Ramës si Kryeministër. Vala e protestave pritet të rinisë në shtator, sikundër ka paralajmëruar Sali Berisha, i cili ka deklaruar se protestat do të jenë të pandërprera deri në rrëzimin e qeverisë.
