LSI, përmes Floida Kërpaçit, i ka drejtuar një thirrje SPAK që të mos bëhet bashkëfajtor me Edi Ramën dhe Erion Veliajn lidhur me aferën e inceneratorëve.
Kërpaçi tha se sot po kuptojmë edhe më mirë se ku shkuan paratë e shqiptarëve, ku në vend të ndihmës për familjet shqiptare gjatë covidit, ato shkonin për të furnizuar skemën korruptive të inceneratorëve.
“Në vend që të përmirësoheshin shkollat shqiptare, qeveria jonë ka ndërtuar një plan financiar 30 vjeçar me inceneratorin e Tiranës, sesi taksat e rritura të qytetareve t’i kthejë në financa për makinerinë e propagandës dhe patronazhizmit.
Në vend që të mbështeten ekonomikisht familjet sepse çmimet janë rritur në nivele të papërballueshme, sot paguajmë 80.000 dollarë në ditë për inceneratorët.
E ku këtu duhet të theksojmë se çmimi i bukës është shumëfishuar. Çmimi i vajit, mishit, produkteve të shportës, është rritur me nga 20-50%.
Si do të zgjidhen problemet aktuale që përballet çdo shqiptar, ndërkohë që buxheti i shtetit dedikohet për koncesionet korruptive si inceneratorët?”, tha ajo.
Në emër të LSI, Kërpaçi i bëri thirrje SPAK të prioritarizojë zbardhjen e plotë dhe pa kompromis të aferës korruptive më të madhe në historinë e Shqipërisë, atë të 3 inceneratorëve.
“SPAK nuk duhet të bëhet fajtor me Edi Ramën dhe Erion Veliaj që po largojnë të rinjtë nga Shqipëria.
Sot e vetmja shpresë është që drejtësia të triumfojë mbi aferën e inceneratorëve, për të cilën vazhdon paguhet çdo ditë nga paratë e shqiptarëve 80.000 dollarë për njerëz që janë në kërkim.
Gjithashtu, i bëjmë thirrje çdo individi dhe zyrtari publik, që ka informacione të dalë përpara dhe të flasë.
Kjo nuk është një betejë politike. Nëse duam të ndërtojmë të ardhmen në Shqipëri, secili nga ne, qytetar, politikan, njeri i drejtësisë apo i medias, duhet të bëjmë rolin tonë në ekspozimin dhe denoncimin e korrupsionit në çdo nivel të zyrave publike të vendit”, tha ajo.
