Sali Berisha, kryetar i PD, duke iu drejtuar mijëra qytetarëve që iu bashkuan protestës në bulevardin “Dëshmorët e Kombit” tha se kjo protestë sot është uragani i lirisë.
“Sot iu bashkuan frontit për shpëtimin e Shqipërisë mijëra e mijëra shqiptarë me dhe pa parti, shqiptarë nga Shtetet e Bashkuara, duke u bërë njv burim drite e shprese për mbarë shqiptarët”, tha Berisha.
Ish-Kryeministri deklaroi se Edi Rama, megjithëse ka vendosur monizmin e plotë në vend, sërisht ia mbathi nga Tirana dhe sërisht do ia mbathë, pasi kohërat e tij janë të numëruara.
“Edi Rama, ne të dy sot jemi armiq, po pse jemi armiq? Sepse ti Edi Rama ke pëër ideal pushtetin, pushtetin dhe vetëm pushtetin, kur unë me këta burra e gra, djem e vajza, kemi për ideal vetëm lirinë.
Ne jemi armiq Edi Rama sepse ti pushtin e do për të pasuruar veten, për të varfëruar e poshtëruar qytetarët, kur unë lirinë e dua për ti kthyer dinjitetin shqiptarëve.
Edi Rama ne jemi armiq, sot ti ia ka mbathur, gabim ke bërë, ti ke blinduar dyert, gabim ke bërë. Ne nuk veprojmë në pabesi, kur të themi mbathja do tia mbathësh. Mos harro se me forcën e idealeve të lirisë, ne thërrmojmë çdo bunker e çdo blind.
Edi Rama ti je problemi i madh i lirisë së shqiptarëve, je problemi i madh i çdo qytetari që i thotë lirisë liri dhe dinjitetit, dinjitet, sepse ti qëndron në pushtet me votën e vjedhur, me votën e blerë, me votën e përgjakur”, tha Berisha.
Ish-Kryeministri tha se Edi Rama vendosi pushtetin e plotë monist me votën e vjedhur, duke shkelmuar idealet e të gjallëve dhe të vdekurve, shkelmove idealet e shqiptarëve.
“Po të betohem për flamurin e kombit: votën e vjedhur kurrë nuk ta falim, mos luaj me votën sepse jemi të vendosur të bëjmë çdo sakrificë që burrat e gratë, djemtë e vajzat e Shqipërisë, të votojnë të lirë.
Edi Rama, je treguar armik i fjalës së lirë, ke përdorur metodat e frikës dhe terrorit për ti mbyllur gojën e shqiptarëve, ke përdorur tenderat publikë për të blerë mediat, jam këtu për të garantuar shqiptarët se fjala e lirë do të jetë beteja jonë dhe ata që guxojnë të prekin fjalën do të mjerohen”, tha Berisha.
