Ka kosto, por edhe benefite. Kështu është shprehur Guvernatori i Bankës së Shqipërisë, Gent Sejko, kur është pyetur lidhur me amnistinë fiskale. Sejko tha se amnistia do të sillte formalizimin e ekonomisë dhe futjen e parasë në sistemin bankar.
Megjithatë, ai u shpreh se duhet të shmanget pastrimi i parave.
“Amnistinë fiskale e shohim me kosto dhe benefite. Ajo që ne shohim si kryese është formalizimi i ekonomisë. Futjen e numrin të llogarive dhe futjen e parasë në sistemin bankar. Në këtë drejtim amnistia do të jepte impakt pozitiv. Por ka edhe kosto që lidhet me shmangien e parave të krimit dhe korrupsionit.
Nuk duhet të lejojmë që të pastrohen paratë dhe në esencë duhet që të mos krijohet koncepti i amnistive të vazhdueshme. Amnistia të bëhet vetëm njëherë’, deklaroi Sejko.
Qeveria ka propozuar amnistinë fiskale. Në këtë amnisti nuk mund të përfitojë asnjë politikan, funksionar shteti, gjyqtar, prokuror apo familjarë të tyre. Puna në të zezë e deklarohet si subjekti kryesor i amnistisë. Përfituesit synohet të jenë emigrantët që ndër vite kanë siguruar të ardhura nga punë të ndryshme të padeklaruar, edhe pse ka dyshime të forta se emigrantët po përdoren si një fasadë, në këtë proces. Kundër draftit të paraqitur është shprehur opozita, por edhe Komisioni Europian. Gjithashtu më parë kundër një amnistie fiskale janë shprehur edhe FMN dhe organizma të tjera ndërkombëtare.
