Më në fund pritja mbaroi dhe ëndrra realizohet. Florian Marku do të boksojë pëpara tifozëve shqiptarë në stadiumin kombëtar në Tiranë. Kampioni i botës për Federatën IBF ka zyrtarizuar ndeshjen në datën 25 gusht, ndërsa premton se do të jetë një atmosferë spektakolare.
Emri i rivalit në ring nuk është bërë i ditur ende, por 29-vjeçari fton të gjithë tifozët t’i bashkohen festës kuqezi dhe emocioneve të asaj mbrëmjeje.
Florian Marku është i pamposhtur në karrierën e tij në ring, me 11 fitore dhe 1 barazim. Në fakt, boksieri prej shumë kohësh ka kërkuar të zhvillojë një ndeshje në Tiranë dhe pas shumë përpjekjesh ia ka arritur qëllimit të organizojë këtë sfidë në vendlindje. Çdo përgatitje është drejt përfundimit dhe siç theksojnë organizatorët, do të jetë një natë e paharrueshme jo vetëm për mbretin shqiptar, por për të gjithë publikun shqiptar.
Boksieri i lindur në Lushnjë ka shkëlqyer në arenën ndërkombëtare, edhe pse ka pak vite mes profesionistëve dhe falë fitoreve të njëpasnjëshme, ka bërë që flamuri dhe himni kombëtar të dëgjohet në shumë vende të botës.
Fitorja e fundit ndaj uellsianit Kris Xhenkins ka ndihmuar boksierin shqiptar që të ngjisë shkallë të rëndësishme në klasifikimin botëror të peshës “welter”.
