Kryetarja e LSI Monika Kryemadhi deklaroi në emisionin ‘Task Force’ në Syri Tv se deklaratat e kryeministrit Edi Rama në Komisionin Hetimor për inceneratorët janë një provë shumë e fortë.
Kryemadhi publikoi edhe një foto të bërë sot ku theksoi se inceneratori i Tiranës nuk ekziston, ndërsa paratë janë zhdukur.
“Një nga provat e patjetërsueshme, deponimi i kryeministrit 10 orë në komision, është provë, në cilësinë e një firme.
Tha ne nuk kemi investuar tek inceneratorët, por kemi marrë shërbimin. Kryeministri ka gënjyer. Ka thënë ky ka investuar 128 mln euro, por ti do fillosh të paguash shërbimin 29 euro tonin.
Më 23 mars ka marrë firmën e paligjshme nga Veliaj, më 1 prill inceneratori që s’ekziston ka filluar të marrë para”, tha Kryemadhi.
Kryemadhi tha se inceneratori i Tiranës është offshore, ndërsa si trurin e skemës korruptive dhe fshejes së gjurmëve, akuzon kryeministrin Edi Rama.
“Korrupsioni i inceneratorit të Elbasanit dhe Fierit, hapeshin kompani, merreshin paratë, tërhiqeshin nga bankat e nivelit të dytë, mbylleshin kompanitë. Flagrante.
Sa i përket kësaj skeme, shumë më e vështirë, janë parë qindra miëjra fatura që janë analizuar. Inceneratori i Tiranës, është off shore.
Duket që pas inceneratorit të Elbasanit e Fierit, Rama është bërë truri i skemës financiare, për të menaxhuar e fshehur gjurmët e këtij operacioni financiar për të përgatitur periudhën e fushatës zgjedhore të 2021.
Unë jam e sigurt që koka e truri financiar i kësaj skeme, jo vetëm të evazionit fiskal dhe përdorimit të fondeve publike të buxhetit të shtetit, por është edhe truri i pastrimit të parave të drogës që përmes kompanive fiktive, kanë futur para të pisëta jashtë Shqipërisë”, tha Kryemadhi.
