Kryetari i Partisë Demokratike, Sali Berisha, iu drejtua përmes një mesazhi qytetarëve shqiptarë, lidhur me protestën e 7 korrikut, e cila do të zhvillohet në orën 19:00 para godinës së Kryeministrisë.
Berisha ftoi qytetarët në protestë duke u shprehur se kauza për të cilën protestohet është edhe më e madhe se ajo e vitit 1991, kur ra regjimi komunist.
“Ftoj shqiptarët të bashkohen në 7 korrik. Kauza për të cilën ne nisim protestat është sot më e madhe, ndoshta edhe se në 91.
Në 91 vërtetë kishim të bënim me një regjim monist të plotë, por një regjim monist në shpërndërje, në rrafshin ndërkombëtar në rënie të lirë, kurse sot kemi të bëjmë me një regjim monist të plotë që duhet ta shtyjmë drejt shpërbërjes, që kalon nga skandali në skandal.
Do të ishte përgjegjësi e pafalshme për ne nëse do ta toleronim më tej. Të bashkohemi për t’i dhënë Shqipërisë kthesën që meriton, shpresën që meriton. Dhe atë do ta bëjmë vetëm ne”, tha Berisha.
