Nga Madridi, ku po merr pjesë në ditën e tretë të Samitit të NATO-s, kryeministri Edi Rama ka publikuar një video teksa bisedon me liderët e vendeve anëtare.
Krahas videos, kreu i qeverisë shqiptare shkruan në postimin në Facebook: “Mbase sot lajmi i mirë…”.
Ndërkohë ai shfaqet duke biseduar edhe me presidentin bullgar, Rumen Radev.
Bullgaria miratoi të premten e kaluar, rezolutën në të cilën mbështet propozimin e presidentit francez, Emmanuel Macron për zgjidhjen e ngërçit me Maqedoninë e Veriut.
Bullgaria e ka bllokuar procesin e integrimeve për Maqedoninë e Veriut për shkak të kontestit mes dy vendeve për çështjen e gjuhës dhe të kaluarës historike.
Gjatë ditëve të fundit kryeministri Edi Rama nuk i ka kursyer kritikat ndaj Bullgarisë, ku është shprehur se po mban peng dy vende të NATO-s. Një reagim ka ardhur edhe nga Ministria e Jashtme bullgare, që i kërkonte Ramës të “rregullonte gjuhën”.
