Nga Boldnews.al
Në kohën kur Niko Peleshi po mbronte me fanatizëm në Kuvend “charterin” e Ramës, Ministria e Mbrojtjes do të rishpallte tenderin për satelitët e Edi Ramës.
Ministri është vënë totalisht në shërbim të Kryeministrit, pasi për qokat e “të gjatit” shqiptarët po paguajnë miliona euro, nga avioni personal i numrit një të qeverisë, deri te ideja e satelitëve.
Pak ditë më parë, redaksia e Boldnews.al botoi ekskluzivisht njoftimin se Ministria e Mbrojtjes anuloi tenderin 7.2 milionë USD për satelitët hapësinorë, të cilat do të monitoronin territorin shqiptar. Lajmi mori dhenë dhe më i dëmtuari ishte pikërisht Peleshi, ministri i Mbrojtjes, pasi institucioni që duhet të kryente procedurat ishte Agjencia Kombëtare e Mbrojtjes Civile.
Sipas informacioneve, ka pasur shkarkime dhe largime punonjësish, ndërsa Peleshi ka shpejtuar për t’i plotësuar “qokën” Ramës. Ai ka rishpallur tenderin për satelitët,vlera e të cilit është plot 7.2 milionë euro.
Më parë, ky tender u anulua pasi s’kishte asnjë ofertë. Më saktësisht, në datën 20 qershor 2022, AKMC-ja njoftonte se “arsyet e Anulimit janë bazuar në ligjin nr. 36/2020 ‘për prokurimet në fushën e mbrojtjes dhe të sigurisë’, pasi asnjë nga ofertat e paraqitura nuk përputhet me kriteret e përcaktuara në dokumentet e tenderit”.
Ndërkohë, 7 ditë më vonë, në datën 27 qershor, e njëjta agjenci ka rishpallur tenderin me vlerë 671.760.000 lekë pa TVSH, ose 7.2 milionë USD me TVSH. Objekti i kontratës është “realizimi i projektit të monitorimit të territorit me teknologji të avancuar (shërbimi satelitor), për një periudhë 3 vjeçare”.
Por, ajo që bie në sy në ditën e rishpalljes së këtij tenderi është fanatizmi i Niko Peleshit për të mbrojtur në Kuvend kryeministrin Edi Rama. Ai ka deklaruar se “nuk ka interes që Shqipëria të blejë avionë për shuarjen e zjarreve”. Por, ai tha se “charteri” i Ramës duhet për “seriozitetin e shtetit”. Por, nëse ky shtet, s’ka avionë dhe helikopterë për të shuar zjarret, kujt i duhet serioziteti i Ramës që të bredhë me “charter”? A mos është më mirë që ato para t’i shpenzojë për këto mjete që t’i vinë në ndihmë jetës dhe pronës së shqiptarëve?! Dhe jo komoditetit të Ramës!
Por, në Kuvend, Peleshi tha se po përgatit një draft që mbrojtja kundër zjarrit t’i kalojë privatit. Duke pranuar dështimin e tij dhe të qeverisë.
