Kryeministri Edi Rama i është përgjigjur reagimit të ministrisë së Jashtme bullgare që kërkonte moderimin e gjuhës së kreut të qeverisë shqiptare.
Reagimi i palës bullgare erdhi pas akuzave të Ramës drejtuar Bullgarisë, i cili foli për “çmenduri bullgare” një ditë më parë në Bruksel, si dhe kumtoi se integrimi i Shqipërisë e Maqedonisë së Veriut po mbahet peng nga Bullgaria.
Reagimi i Ramës – “Oh! Ministria e Jashtme e Bullgarisë ka një problem me mënyrën time të të folurit! Mjaft e drejtë. Edhe unë kam një problem me mënyrën se si Bullgaria dëshiron të zgjidhë çështjet biletarale duke përdorur procesin e zgjerimit si mjet për rrëmbimin e dy vendeve të NATO-s! Miq të lehtë: Hiqni VETO-n ose duroni me mua”, shkruan Rama në Twiiter.
Rama zbuloi se ka pasur një bisedë telefonike me liderin e opozitës bullgare:“Më lini tju kujtoj të dashur miq bullgarë se kam pasur një bisedë të shkurtër në telefon me Boyko Borissov për të zgjidhur miqësisht dhe ndershmërisht çështjen e minoritetit bullgar në Shqipëri! Miqtë e vërtetë nuk dëmtojnë njëri-tjetrin, por flasin të vërtetën me njëri-tjetrin dhe i japin dorën”.
Reagimi i ministrisë bullgare – Më herët, në një njoftim zyrtar, ministria e Jashtme Bullgare do të shprehej:
“Bullgaria gjithmonë ka qenë mes shteteve anëtare të BE që ka mbështetur integrimin e popullit shqiptar. Kemi mbrojtur perspektivën europiane të Shqipërisë dhe nisjen e bisedimeve, edhe kur ishte shumë më e vështirë se sa sot. Përgjatë viteve nuk ka pasur shumë zëra të tjerë krah nesh. Edhe sot, pavarësisht gjithçkaje, i qëndrojmë kësaj ideje, në emër të një të ardhmeje të përbashkët europiane. Nuk është hera e parë që kemi dëgjuar ofendime të pamerituara nga kreu i një qeverie. Një gjuhë e tillë nuk mund të justifikohet. Presim që Kryeministri i Shqipërisë të moderojë gjuhën, duke e bërë të përshtatshme për politikanin e një vendi kandidat për në BE. Në këtë pikë, këmbëngulim që të ruajmë një ton të mirë komunikimi. Ne kemi të ardhme të përbashkët me Shqipërinë. Politikanët shkojnë e vijnë, kombet mbeten. Popujt tanë kanë një interes të përbashkët, që nuk duhet të minohet nga gjykimet e gabuara. Është e papranueshme që marrëdhëniet mes dy shteteve të mbeten peng e sjelljes së Kryeministrit të Shqipërisë”.
