Nga Boldnews.al
Kësaj i thonë drejtësi që të numëron edhe kokrrat e grurit, jo më pasurinë e vendosur me korrupsion apo trafiqe. Plot 270 banorë të fshatit Kozarë të Kuçovës erdhën në Gjykatën e Posaçme Kundër Krimit të Organizuar dhe Korrupsionit. Ata dëshmuan se grurin, elbin dhe tagjinë e korrnin me autokombajnën e Bektash Shtëpënjës, që nga viti 1991. Por SPAK se ha atë kokërr ulliri. “Kupon tatimor a ke”?-i thanë Bektashit. Ai ngriti supet duke deklaruar se nuk kishte si të kishte pasi ashtu kanë punuar në fshat që nga viti 1991.
Por dale Bektash se me autokombajnë vërtetë mund të kesh vënë ca pasuri, por djali i ishte dënuar për trafiqe në Itali dhe OFL (Operacioni Forca e Ligjit) kishte vendosur sekuestron e autokombajnës, një tokë arë 1700 metra katrorë, dy apartamente dhe një garazh. Sipas SPAK, ato kishin ardhur nga aktiviteti kriminal i të birit dhe Bektashi duhet ta dorëzoje autokobajnën të cilën e ka pasur që nga viti 1991.
E pra kjo është drejtësia e re. Një më një ja numëroi Bektashit kokrrën e grurit, duke dalë në përfundimin se pasuria rrjedh nga aktiviteti kriminal i të birit. Me këtë metër duhet të maten të gjithë “kokat” e politikës dhe të krimit të organizuar. Por kusur për tu tallur me autokombajnën dhe shirë propagandë, asnjë qytar nuk ja ka drejtësisë së re.
Ky vendim duhet të shërbejë si kazus në sistemin e drejtësisë. Të merren të gjithë politikanët dhe tu kërkohet kuponi tatimor deri edhe për të bredshmet firmato që mbulojnë aferat korruptive. Sikurse i kërkuan Bektashit të sjellë 270 banorë të fshatit për të dëshmuar se e korrnin grurin me autokombajnën e tij ashtu duhet të sillen edhe dëshmitarët qytetarë që të rrëfejnë se kur deputeti, drejtori, apo krimineli i hequr si biznesmen u jepte nga 50-500 euro në këmbim të votës, nuk prisnin kupon tatimor.
Mjafton vetëm një orë shëtitje në hyrje të Parlamentit që SPAK të urdhërojë “sekuestron preventive” të të gjithë deputetëve dhe ministrave deri në vendimin e formës së prerë. Vetëm vëshjet, bizhutë, parfum apo edhe xhelatosja e flokëve nuk justifikohet nga paga që marrin. Po makinat e luksit me të cilët lëvizin, po qiratë e zyrave që paguajnë, po enturazhin e madh të bashkëpunëtorëve që u japin rroga të majme për të bërë sekserllëqe?
Kujtoni autokombajnën e Bektashit. Me të drejtë nodshta i thatë se vërtetë mund të kesh korrur grurin e fshatarëve të Kozarës për më shumë se 30 vite, por yt bir është marrë me trafiqe dhe ato dy aparlamente dhe një garazh nuk e justifikon, të paktën me faturë tatimore jo.
Për fat të keq koha duket që me saba. SPAK do vijojë të ofrojë spektakël për propagandë, duke bërë shembuj Bektashë të tjerë, pa guxuar të prekin aty për të cilën ata janë ngritur si strukturë. Mjafton që hetimi të nisë për një orë dore, telefon apo edhe kostum mbi 3000 euro për të arritur në thelën e madhe në zbulimin e korrupsionit dhe krimit të organizuar që sot shëtit lirshëm, edhe me faturë të prerë tatimore, pasi paranë e pastruan në lavatriçen e madhe të pushtetit në tendera publik.
