Nga Boldnews.al
Skandali i shembjes së rrugës në Borsh, në të cilën u përfshi direkt firma “Salillari”, nuk e ka penguar kreun e Autoritetit Rrugor Shqiptar, Evis Berberi, që t’i japë sërish kësaj firme të njëjtën rrugë për ta mirëmbajtur.
Nëse në atë kohë shembja u lidh direkt me emrin e firmës që e mirëmbante, në këtë kohë skandali thellohet pasi autoritetet të cilat duhet të merrnin masa për “ndëshkimin” e fajtorëve ia japin sërish tenderin e mirëmbajtjes firmës “Salillari”.
Redaksia e Boldnews.al ka siguruar dokumentet e kontratës D për mirëmbajtjen e rrugëve, ku në këtë procedurë tenderuese ka marrë pjesë vetëm firma “Salillari”, e cila ka fituar me 99.9 % të fondit të akorduar. Pra, e njëjta firmë, e cila duhet të mirëmbante atë segment, por që shteti shqiptar pagoi një shumë prej 1.6 milionë euro për t’a riparuar, fiton sërish mirëmbajtjen.
Por, kush i pagoi kostot e rindërtimit?! Natyrisht, me taksat e shqiptarëve, të cilët panë sesi iu “grabitën” miliona euro. Për më tepër, asnjë person, qoftë shtetëror apo privat, nuk mban përgjegjësi.
Sipas dokumenteve që disponon Boldnews.al, Autoriteti Rrugor Shqiptar ka finalizuar kontratën D të mirëmbajtjes së rrugëve. Dokumenti i mësipërm është shpallja e fituesit e këtij tenderi, e cila ka pasur si objekt “mirëmbajtje me performancë e akseve kryesore të rajonit Jugor”.
Fondi i kësaj kontrate ka qenë 1.411.691.646 lekë, ndërsa ARRSH thotë se në këtë procedurë ka marrë pjesë vetëm firma “Salillari”, e cila ka ofruar 1.411.597.878 lekë, ose 99.9 të fondit limit. Firma e oligarkut të ndërtimit ka lënë rrugës vetëm disa qindarka, ndërsa ka dyshime të mëdha se mes firmave fituese të këtyre tenderëve dhe ARRSH-së ka pasur një “pakt” se në këto procedura do të merrte pjesë vetëm një ofertues.
Boldnews.al ka raportuar në vijimësi për këto kontrata, ku firma “Alko Impex” e familjes së ish deputetit Sadri Abazi fitoi e vetme kontratën B me objekt “mirëmbajtje me performancë e akseve kryesore të Rajonit Qendror dhe Verilindor”, ku vlera e kësaj kontrate ishte rreth 14 milionë euro.
Ndërkohë, kontratën C, me objekt “mirëmbajtje me performancë e akseve kryesore të Rajonit Qendror dhe Juglindor, me vlerë sërish 14 milionë euro, e fitoi firma “2 T”, e vëllait të komandantit të Gardës së Republikës. Kontratën A e fitoi firma “Geci”, me pronar z. Ramë Geci, ku vlera ishte mbi 8.5 milionë euro. Fituesit të të katërtave kanë “garuar” me veten, duke i marrë shtetit edhe qindarkat. Pra, s’ka pasur garë!
Në dokumentet e siguruara nga BoldNews.al, Autoriteti Rrugor Shqiptar parashikon se kontrata D parashikon edhe mirëmbajtjen e akseve të jugut, përfshirë edhe rrugën Vlorë-Sarandë, pikërisht rrugën e shembur të Borshit.
“Rruga është e gjatë 121.8 km. Rruga përshkon terrene të rrafshëta, kodrinore/kodrina, dhe ato të pjerrëta/malore (Llogara, ku janë re rrëshqitje toke)” thuhet në këto dokumente. Sipas saj, rruga e Rivierës, nisur nga parametrat e seksionit tërthor, është me nji karrexhatë me dy sense lëvizje. Më tej thuhet se sinjalistika rrugore dhe shenjat horizontale janë në gjendje të dobët.
“Të gjitha urat dhe strukturat janë përgjithësisht në kushte të mjaftueshme. Sistemi i drenazheve kërkon punime rehabilitimi” thuhet në dokumente, pa përmendur shembjen në Borsh. Ndërkohë, për sigurinë, thotë se në përgjithësi është në gjendje të mjaftueshme, ndërsa ka shumë hyrje të papërshtatshme dhe të paautorizuara të rrugëve dytësore ose private që kryqëzojnë rrugën kryesore.
Në datën 8 janar 2021, rruga e Borshit u shemb, megjithëse mirëmbahej nga firma “Salillari”. Kjo e fundit kishte një kontratë 13.7 milionë euro për mirëmbajtjen e rrugëve në Jug. Pas ngjarjes, pati një hetim nga KLSH, por deri më sot, askush nuk mbajti përgjegjësi. Aq më tepër, që të njëjtën rrugë, tashmë do e mirëmbajë sërish “Salillari”. Në këtë vend, çudia më e madhe 3 ditë zgjat, pavarësisht se në lojë janë miliona euro, që konsiderohet dëm në buxhetin e shtetit.
