Nga Boldnews.al
Operatori i Shërbimeve të Kujdesit Shëndetësor në Tiranë ka mbyllur një tender të çuditshëm për blerjen e testeve të shpejta anti-Covid.
Procedura është hapur në Prill 2022 dhe fondi limit ishte 201 milionë lekë të reja ose 1.66 milionë euro.
Në garë rezulton se kanë marrë pjesë 11 operatorë ekonomikë, nga të cilat 6 janë skualifikuar.
Në përfundim, fitues i tenderit është shpallur shoqëria “Siwssmed”, e cila ka paraqitur edhe ofertën më të ulët.
Por, pikërisht tek çmimi i ofertës qëndron edhe “çudia” e këtij tenderi.
Kompania “Swissmed” ka paraqitur ofertën me vlerë 23.5 milionë lekë të reja, ose rreth 10 herë më lirë se sa çmimi limit i vendosur në tender nga vartësit e Ministres së Shëndetësisë, Ogerta Manastirliu.
Kjo situatë krijon më së paku dy dilema; nëse cilësia e testeve është e ulët dhe rrjedhimisht me çmim të lirë; ose Autoriteti Kontraktor ka fryrë fondi limit në vlera ekstreme.
Dyshimet më të mëdha qëndrojnë mbi institucionin shtetëror.
Të dhënat zyrtare të tenderit dëshmojnë se edhe ofertat e kompanive të tjera në këtë tender variojnë nga 35 milionë deri në 120 milionë lekë të reja, dukshëm shumë më të ulta se sa fondi limit i përcaktuar nga Operatori i Kujdesit Shëndetësor Tiranë prej 202 milionë lekë.
Pra, testet anti-Covid mund të gjenden në treg shumë më lirë se sa fondi që ka parashikuar Operatori i Kujdesit Shëndetësor Tiranë.
Procedurat normale të tenderave parashikojnë që institucionet, para se të hapin procedurat e prokurimit publik, fillimisht testojnë tregun për të nxjerrë një çmim mesatar për produktin që kërkojnë.
Si rregull, edhe Operatori i Kujdesit Shëndetësor i kryeqytetit duhet ta ketë kryer këtë testim paraprakisht.
Por, ajo që ngre pikëpyetje është se ku është bazuar për të përcaktuar fondin limit 1.6 milionë euro, kur në tender rezulton se kanë marrë pjesë 11 kompani dhe të gjitha kanë paraqitur oferta shumë më të ulta se parashikimi i institucionit.
Prej vitesh, ekspertët e prokurimeve publike kanë ngritur dyshimet se autoritetet shtetërore shtojnë në mënyrë fiktive fondin limit të tenderave.
Ka nga ata që besojnë se këto “manovra” janë një paradhomë për korrupsion në procedurat e prokurimit publik.
Në tenderin 1.6 milionë euro për blerje testesh anti-Covid nuk ka, të paktën deri më tani, pretendime për korrupsion apo veprime abuzive.
Megjithatë, oferta fituese 10 herë më lirë se sa fondi limit, krijon të gjithë terrenin për të ngritur dyshimet publike.
Kompania fituese “Swissmed” është pjesë e grupit financiar “Intermedica”, në pronësi të biznesmenit Vasil Llajo.
Kjo kompani administratohet aktualisht nga Aris Llajo, djali i drejtuesit të “Intermedica”.
