Rreth 4 mijë karta SIM janë kapur nga sektori i kibernetikës në aeroportin e Rinasit 10 ditë më parë.
Kartat janë kapur pas skanimit dhe mësohet se kanë ardhur nga Londra, Britania e Madhe.
Personi që mbante emrin e postës ku ishin dërguar kartat ka mohuar të ketë dijeni apo të ketë bërë një porosi të tillë.
Materialet i janë referuar prokurorisë për veprime të mëtejshme hetimore.
Kujtojmë që kartat SIM shiten edhe në tregun e zi dhe shpesh herë kemi parë që mund të përdoren për aktivizim të lëndës plasëse në raste atentatesh.
Në një njoftim zyrtar, policia bën me dije se ka nisur procedim për shtetasin M.H., ndaj të cilit rëndojnë veprat penale “Mashtrimi kompjuterik” dhe “Shitja e paautorizuar e kartave SIM”.
“Njësia “C” për Hetimin e Krimit Kompjuterik, më datë 09.06.2022, ka referuar materialet në Prokurorinë pranë Gjykatës së Rrethit Gjyqësor Tiranë, në ngarkim të shtetasit M. H., për veprat penale “Mashtrimi kompjuterik” dhe “Shitja e paautorizuar e kartave SIM”, pasi në adresë të këtij shtetasi, ka ardhur me postë, në Rinas, një pako postare me 3991 karta SIM angleze”, thuhet në njoftimin e policisë.
