Deputeti demokrat, Tritan Shehu analizon deklaratat e kancelarit të Gjermanisë, Olaf Scholz gjatë turit të tij dy ditor në Ballkanin Perëndimor.
Scholz mbështeti vetëm Procesin e Berlinit, thotë Shehu, duke shtuar se ‘Tregu i përbashkët rajonal’ i kësaj nisme afirmon rritjen e bashkëpunimit ekonomik mes vendeve, ndërsa ‘Ballkanin e Hapur’ nuk e mori në konsideratë.
“Deklarata prej tij për “rigjallërimin” e Procesit të Berlinit është jo vetëm një impenjim konkret, por dhe një “tërheqje vëmendje” për ata që duan ta “sfumojnë” nëpërmjet “Ballkani të Hapur” serb”, shkruan Tritan Shehu në një postim në rrjetet sociale.
Deklarata
Gjermania po konsolidon rolin e saj thelbësor në rajonin tonë. Një vizitë për t’u përshëndetur ajo e kancelarit Scholz.
Një goditje e fortë për aventurizmat politike në rajon:
Deklaratat e kancelarit gjerman ishin këtë herë të qarta, në përputhje me realitetet e perspektivat.
1-Kërkesa e tij që marrëveshja Kosovë – Serbi duhet të përfundojë me “njohje reciproke” është e një rëndësie të veçantë e krejt në përputhje me realitetet e nevojat e rajonit e Europës.
Pa një gjë të tillë çdo skemë e plotë e bashkëpunimit rajonal do të ishte e handikapuar.
2-Konfirmimi i tij për rrugën e vetme të rajonit tonë, atë të integrimit europian të tij merr një rëndësi të veçantë, veçanërisht në këtë periudhë turbulencash, që shpesh nxjerrin në sipërfaqe edhe “Plane B”, krejt në kundërshtim këto me interesat tona jetike.
3-Dhe në këtë kontekst mbështetja e tij vetëm ndaj “Procesit të Berlinit” e “Tregut të Përbashkët Rajonal” të tij, e plotëson dhe konsolidon atë konfirmim, duke kërkuar të na largojë nga çdo nismë tjetër pa Brukselin brenda, siç është “Ballkani i hapur”, të cilën ai as e mori në konsideratë.
Deklarata prej tij për “rigjallërimin” e Procesit të Berlinit është jo vetëm një impenjim konkret, por dhe një “tërheqje vëmendje” për ata që duan ta “sfumojnë” nëpërmjet “Ballkani të Hapur” serb.
4- Konfirmimi i tij për mbrojtjen e “sovraniteteve” në kufijtë ekzistues na kujton një tentativë tashmë të dështuar, por akoma të rrezikshme, atë të shkëmbimit të territoreve.
Pa asnjë dyshim që duhet bërë një falenderim i qartë për z.Scholz e pozicionimin e Gjermanisë!
