Personi në foto është Petraq Gjika, roje në serat e fshatit Mbrostar Ura në Fier, i cilu u gjet i vrarë mëngjesin e sotëm.
Gjika u gjet i pajetë rreth orës 06.40 me plagë nga një mjet prerës. Viktima ishte 67 vjeç dhe banues në fshatin Daullas po në Fier.
Viktima u gjet jashtë serave ku ishin kultivuar kastravecë, në ambientet jashtë godinës që ai ruante gjatë natës. Ngjarja u zbulua rreth orës 06:40 nga banorët e zonës. Nuk dihen rrethanat se si ka ndodhur ngjarja, ndërkohë që objekti është i pajisur me kamera sigurie.
Petraq Gjika është sulmuar dhe më parë me thikë. Korrikun e 2018 ai është sulmuar me thikë nga një person teksa ishte duke pirë kafe në lokal, pranë vendit të punës. Në atë kohë 63 vjeç, Gjika mbërriti në spital i gjakosur, por mundi të jetonte. Me plagë në fyt dhe në bark Petraq Gjika i mbijetoi asaj ngjarje, por fatkeqësisht sot, në një rast të dytë dhe të ngjashëm ai ka ndërruar jetë. Nuk dihet nëse dy ngjarjet kanë lidhje me njëra-tjetrën, por 4 vite më parë autori u arrestua dhe ishte Xhevat Bregu.
Burime nga policia bëjnë me dije se janë shoqëruar edhe disa persona, të cilët mund të kenë dijeni për ngjarjen. Roja i një tjetër sere pranë vendit ku punonte 67-vjeçari dhe një çoban, janë shoqëruar për t’u marrë në pyetje, pasi kanë qenë pranë vendit ku ndodhi krimi dhe u gjet i pajetë Petraq Gjika.
Po ushtrohen kontrolle në kodrën përkarshi serave dhe kabinës ku u gjet i pajetë roja, ndërsa dëshmia e të shoqëruarve pritet të jetë deçizive për zbardhjen e së vërtetës. Pistat e hetimit janë disa, nga konfliktet e momentit e ato banale, deri tek konfliktet e mëparshme që mund të ketë pasur viktima me persona të tjerë.
