Nga Boldnews.al
Autoriteti Rrugor Shqiptar po krijon një skemë të pastër rotacioni, ku firmat e mëdha po fitojnë të vetme kontratat e majme të mirëmbajtjes së rrugëve. Para pak ditëve, Boldnews.al publikoi dy investigime, i pari një tender i mirëmbajtjes së rrugëve të fituar nga firma “2 T”, e vëllait të komandantit të Gardës së Republikës, dhe i dyti tenderin e fituar nga firma “Geci“.
Të dyja kontratat kanë qenë pa garë, duke lindur hije të mëdha dyshimi se gjithçka ka qenë e paracaktuar. Madje, burime të redaksisë sonë pohojnë se bëhet fjalë për një pakt mes firmave të mëdha dhe drejtuesve të Autoritetit Rrugor Shqiptar, ku këta të fundit janë vënë nën akuzë disa herë për favorizime të tilla.
Ndërkohë, pas këtyre kontratave, Berberi i ARRSH-së ka finalizuar kontratën e tretë të madhe, kësaj herë për rrugët e rajonit verilindor dhe rajonit qendror.
Sipas dokumenteve që disponon Boldnews.al, Autoriteti Rrugor Shqiptar ka shpallur fituesin e lotit 2, kontrata B me objekt “mirëmbajtje me performancë e akseve kryesore të Rajonit Qendror dhe Verilindor”.
Në dokumente thuhet se vlera totale e kësaj kontrate është 1.418.031.731 lekë pa TVSH, ose me TVSH rreth 14 milionë euro. “Me anë të këtij njoftimi ju bëjmë me dije se, në këtë procedurë /lot kanë marrë pjesë operatorët ekonomikë të mëposhtëm me vlerat përkatëse si më poshtë: 1. BOE ‘ALKO-IMPEX General Construcion’ & ‘ALKO IMPEX CONSTRUCTION’. Vlera e ofruar është 1.417.993.187 lekë” thuhet në këto dokumente.
Pra, ARRSH-ja ka kursyer nga ky tender vetëm shumën 38.544 lekë, ose, nëse do e konvertojmë në euro, vetëm 321 euro! Pra, në një tender me vlerë 14 milionë euro, diferenca mes vlerës së tenderit dhe ofertës është e papërfillshme. Ose, 99.9 % të fondit të akorduar. Por, kush qëndron pas firmës fituese? Me letra, firma është në pronësi të z.Arbër Abazi, i cili është nipi i ish-deputetit Sadri Abazi.
Pak ditë më parë, Boldnews.al publikoi dokumentet e për kontratën C, “mirëmbajtje me performancë e akseve kryesore të Rajonit Qendror dhe Juglindor”. Loti 3, kishte një vlerë totale 1.455.726.087 lekë me TVSH, ose rreth 12 milionë euro. Në dokumentet e tenderit shkruhej se kriteret e përzgjedhjes së fituesit ishte oferta ekonomikisht më e favorshme bazuar në kosto.
“Me anë të kësaj bëjmë me dije se, në këtë procedurë /lot kanë marrë pjesë operatorët ekonomikë të mëposhtëm me vlerat përkatëse si më poshtë: “2 T”. Vlera e ofruar, ose totali i çmimeve për njësi dhe vlera e pritshme e kontratave, nëse është e zbatueshme, është 1.455.620.460 lekë” thuhej në dokumente. Pra, shumë afër fondit limit, ose mbi 99 % të fondit të akorduar nga Autoriteti Rrugor Shqiptar. Fituesi ishte firma “2 T”, në pronësi të vëllait të komandantit të Gardës së Republikës.
Ndërkohë, disa ditë më vonë, publikuam edhe dokumentet për kontratën A, të fituar nga firma “Geci”, me pronar z. Ramë Geci. Edhe kjo firme ishte e vetmja në garë, ndërsa kishte një vlerë mbi 8.5 milionë euro. Por, pas bërjes së këtyre tenderëve, kanë filluar dyshimet e para. Gjithçka ka qenë e paracaktuar, madje me një rotacion të frikshëm, ku firmat kanë lënë “rrugës” vetë disa bakshishe. Po organet ligjzbatuese, SPAK e të tjera, ku janë?!
