Nga Ohri, ku u mbajt takimi i radhës në kuadër të nismës së “Ballkanit të Hapur”, u prezantua një projekt infrastrukturor – një urë që lidh Velipojën me Ulqinin.
Kryeministri Edi Rama postoi një video në FB të prezantimit të projektit në 3D, teksa shfaqej krah homologut të Malit të Zi.
Sipas projektit, ura do të ketë një gjatësi prej 310 metrash me 3 harqe, do të përdoret për makinat, kamionët, kalimtarët, biçikletat dhe do të ketë 2 korsi, gjithashtu dhe pjesën e vendpushimeve dhe trotuareve. Po ashtu, u tha se ura do të ketë një lartësi që lejon kalimin nën të në rastin kur lumi Buna do të jetë i hapur për mjetet lundruese.
“Është shumë irracionale që dikush nuk e ka bërë më parë sepse nuk është kaq e ndërlikuar. Me këtë urë do të kemi shumë efekte pozitive në të dyja anët dhe ndërlidhshmëria mes dy vendeve do të jetë shumë më e madhe. Ura simbolikisht dëshmon që nuk jemi vetëm Ballkan i Hapur, por që jemi në një fazë të re të mënyrës si kuptojmë marrëdhëniet dy palëshe dhe ato rajonale. Kjo është një urë që do të përdoret nga shumë njerëz që vizitojnë vendet tona. Mendoj që kjo është ideja e përsosur. 100% keni mbështetjen time. Le të ecim shpejt, le të mos nxjerrim ndërlikime të tjera administrative, por të vijojmë menjëherë drejt projektit përfundimtar”, u shpreh kryeministri i Malit të zi Abazoviç.
“Jam shumë mirënjohës sepse ky është vizioni juaj. Kjo ishte nxitja juaj. Ndaj nuk duhet të grindemi se e kujt qe ideja më e mirë, por t’i zbatojmë këto ide mjaft të mira. Jam shumë i lumtur që të bashkohem me ju për ta zbatuar këtë. Kjo është fryma e Ballkanit të Hapur. Gjithçka tjetër që njerëzit mund të thonë nuk ka problem, por kjo është fryma. Pres me padurim të vij t’ju vizitoj në Malin e Zi në shpresë brenda Korrikut, dhe më pas në Gusht për t’ju dorëzuar projektin. Së paku le të arrijmë atë fazën e 70 vjetëve përpara ku gjyshja ime e cila jetonte asokohe në Shkodër i përdorte këto anije dhe ishte nostalgjike për atë kohë. Po të shohësh foto të Marubit sheh vende kaq të bukura me varka të vogla që lundronin. Së paku le të arrijmë aty dhe pastaj për anijet më të mëdha. Edhe ato do të vijnë me kohën sigurisht. Jemi këtu që të ndërtojmë një urë dhe do të ndërtojmë një urë. Le të ndërtojmë urën”, tha Edi Rama.
