Raportuesi për Ballkanin Perëndimor në CDU, Peter Beyer, në një konferencë për mediat në Tiranë, tha se interesi i grupimit CDU/CSU është një Parti Demokratike e fortë, që të luajë rolin e saj si opozitë në Parlament.
Beyer tha se nuk i interesojnë emrat e veçantë, ndërsa theksoi se qëndrimi i CDU/CSU mbetet forcimi i PD-së.
I pyetur nga gazetarët se cilën Parti Demokratike njeh CDU-ja gjermane, Beyer u shpreh se nuk i interesojnë emrat apo figurat, por vetëm niveli i përfaqësimit dhe seriozitetit që PD tregon ndaj atyre që e kanë votuar.
“Atëherë këtu po reagoj menjëherë. Për mua nuk janë personat shumë të rëndësishëm. Ne si CDU kemi interes të kemi një PD të fortë. PD është partia opozitare ka një përgjegjësi të madhe për të bërë opozitën në parlament. Kjo duhet të realizohet nga PD që ka përfaqësues të popullit. Më interesojnë pak figurat e veçantë. Më shumë më intereson forcimi i partisë. Ky është qëndrimi ynë si CDU/CSU”, tha ai.
Beyer zhvilloi takime në Tiranë me deputetin Belind Këlliçi dhe deputeten Jorida Tabaku, të cilët i përkasin dy grupimeve të ndryshme brenda grupit parlamentar demokrat. Në takimin me deputetin Këlliçi, një prej anëtarëve të Kryesisë së PD së drejtuar nga Sali Berisha, është diskutuar mbi mundësinë e bashkimit të Grupit Parlamentar të PD, ku momentaisht janë 3 pjesë: një i pozicionuar në krah të Berishës, disa deputetë që drejtohen nga Enkelejd Alibeaj, dhe një tjetër grupim deputetësh që po ruan një distancë mes Berishës dhe Alibeajt.
