Ndodhin edhe në nëpër botë… Shprehja e famshme rilindase rikthehet herë pas herë në gojët e ministrave e deputetëve që kanë pushtetin për të justifikuar dështimin. Këtë herë përdoret nga vetë udhëheqësi suprem i tyre, për zjarrin që po vijon të shkrumbojë ishullin e Sazanit që prej ditës së djeshme.
Në një postim në faqen e tij në FB, Edi Rama shpërndan reagim me video të ministrit të Mbrojtjes Niko Peleshi. Aty shfaqet Drejtori i Përgjithshëm i Emergjencave Civile Haki Çako, i cili, hipur në një helikopter, duket teksa vjen vërdallë mbi Sazan duke soditur flakët. Procedura, sipas autoriteteve quhet “rikonicion nga ajri mbi ishullin e Sazanit për të vlerësuar nevojën e ndërhyrjeve të mëtejshme por ende nuk ka një ndërhyrje nga ajri”.
Pas kësaj, udhëheqësi Edi Rama lëshon një mesazh edhe për ‘gojët e liga’ që raportojnë apo kritikojnë pse pasuria kombëtare – zona e mbrojtur e Sazanit, po digjet nga flakët. Rama tregon se zjarre ka dhe në Athinë, Turiqi, Spanjë, e kështu me radhë. Pra, siç na shpjegon Rama, nuk na qenkërka një fenomen problematik shqiptar! Madje ai shton se edhe këto vende janë në hall për helikopterë me kova me ujë.
“Sa për ata që nuk kanë sy të shohin çfarë ndodh njëkohësisht, sot që flasim, rrotull Athinës apo çfarë ndodh kudo tjetër në kushtet e zjarreve, nga Turqia e deri në Spanjë, po hidhen përpjetë duke kërkuar helikoptera me kova uji biblik e me shkopinj magjikë, nuk kemi asgjë për të thënë! Janë të njëjtët shqipo, që në tërë historinë e këtij vendi, kanë bërë fiks të njëjtën gjë, llafe, llafe, llafe…”, shkruan kryeministri Edi Rama, teksa në Sazan, raportohet se kundër flakëve po luftohet fuqishëm me… kazma e lopata.
Lexo edhe:
Zjarri në Sazan luftohet me lopata/ Haki Çako sheh flakët nga helikopteri
