Nga Boldnews.al
Një përplasje titanësh, në tenderin e vezëve “të arta” të Drejtorisë së Burgjeve, e cila ka hapur disa procedura për blerje ushqimesh për të burgosurit. Për këto tendera, apo edhe për uniformat, janë vënë nën akuzë ish-drejtorët apo punonjësit e burgjeve të mëparshëm, ndërkohë që “tradita” vazhdon.
Në redaksinë e BoldNews.al mbërritën informacione për një tjetër tender të dyshimtë, për ushqimet e të burgosurve. Bëhet fjalë për tenderin e blerjes së vezëve, ku në këtë procedurë kanë marrë pjesë kompania e vëllait të deputetit socialist Xhemal Qefalia dhe kompania e një ish-të arrestuari për trafik droge.
Por, megjithëse kompania e ish të arrestuarit ofroi më pak, fitues u shpall oferta më e lartë, ajo e Qefalisë. Duket se firma “Dajti Park 2007” i ka marrë me radhë, pasi pak ditë më parë publikuam një investigim për “supën e spitalit”, ku Qefalinjtë fituan kundër një prej “peshkaqenëve” të tenderëve të spitalit, Nikolin Jakën.
Sipas dokumenteve që disponon BoldNews.al, Agjencia e Blerjeve të Përqendruara ka shpallur fituesin e lotit 6, të tenderit “blerje artikuj ushqimorë”, të ndarë në 7 lote, me fond të marrëveshjes kuadër 1.061.007.405 lekë, ose rreth 10 milionë euro me TVSH. Bëhet fjalë për lotin 6, I cili ka pasur si objekt “blerje vezë” me afat të marrëveshjes kuadër 24 muaj dhe me fond të marrëveshjes kuadër 63.194.001 lekë pa TVSH.
“Me anë të kësaj bëjmë me dije se, në këtë procedurë /lot kanë marrë pjesë operatorët ekonomikë të mëposhtëm me vlerat përkatëse si më poshtë: ‘OVVITAL’ me vlerë 47.850.770 lekë dhe ‘DAJTI PARK 2007’ me vlerë 62.410.620 lekë pa TVSH”, thuhet në dokumentet e tenderit. Pra, nga oferta më e ulët deri te oferta më e lartë ka pasur një diferencë prej 14.559.850 lekë, një shumë e konsiderueshme.
Në vijim, Agjencia e Blerjeve të Përqendruara thotë se ka s’kualifikuar firmën që ofroi më pak, “OVVITAL”, pasi nuk ka kapacitete. “Në SPE ka deklaruar vetëm 1 vend të ushtrimit të aktivitetit, stabiliment, për të cilin ka paraqitur edhe 2 licencat përkatëse. Ndërkohë që, nga Ekstrakti i Regjistrit Tregtar të subjektit rezulton se, ky i fundit ka më shumë vende të ushtrimit të aktivitetit (stabilimente), të cilat nuk rezultojnë të jenë të pajisura me licencat përkatëse për ushtrimin e aktivitetit”, thuhet në dokumente.
Siç e shkruam në krye të herës, në tenderin e vezëve për të burgosurit janë përplasur persona me ndikim të madh politik dhe persona me precedentë penalë. Por, ashtu si edhe “përplasja” me Jakën, fitues në të dyja herët ka dalë familja me lidhje politike. Të jetë rastësi? Madje, edhe kur ka një diferencë prej 150 mijë eurosh?! Që fare mirë mund të konsiderohen një dëm, pavarësisht kundërshtarit.
Bazuar në të dhënat e QKB-së, në firmën “OVVITAL” figuron me 50 % të aksioneve z.Xhevdet Troplini, i arrestuar për trafik droge në 2006. Nëse do të bësh një kërkim të thjeshtë në internet për këtë emër do të dalin qindra artikuj të kohës për arrestimin, i cili njihet edhe me pseudonimin “Poja”. Por, edhe në njoftimet e Policisë së Shtetit, të para disa viteve, ku Troplini ishte subjekt i OFL-së, ku iu verifikua pasuria. Madje, ai u akuzua edhe për kërcënimin e një gazetare për skandalin e groposjes së pulave para pak muajsh.
Ndërkohë, kalojmë te firma tjetër pjesëmarrëse dhe fituese e tenderit të blerjeve të vezëve! Nëse firma që ofroi më pak ka si aksioner një person me precedentë penalë, firma
“DAJTI PARK 2007” ka si pronar Kujtim Qefalinë, vëllanë e deputetit Xhemal Qefalia. “Precedenti” i kësaj firme është lidhja me politikën, e cila siç duket edhe nga këto procedura është më efektive për të fituar para publike.
Në këtë vend, siç po e tregojnë edhe bëmat, nuk fitojnë më muskujt apo armët, por “banda” tjetër, ajo e lidhur ngushtë me politikën! Madje, e njëjta firmë fitoi edhe dy vite më parë tenderin e vezëve të burgjeve, pasi në atë rast, nga 4 firma në garë, bëri ofertë ekonomike vetëm kompania e vëllait të deputetit.