Qëndrimet e kryetarit të ri të PD-së Sali Berisha dhe Enkelejd Alibeajt, i cili sipas letrave të Kuvendit rezulton ende kreu i grupit parlamentar demokrat, vijojnë të përplasen.
Rasti i fundit është qëndrimi lidhur me raundin e katërt të zgjedhjes së Presidnetit të ri. Këtë të Premte, në një konferencë për mediat, Berisha tha se do të marrin pjesë në seancën e nesërme, por do të votojnë kundër kandidaturës së propozuar nga Edi Rama.
Nga ana tjetër, Enkelejd Alibeaj, në një prononcim për gazetarët, tha se Partia Demokratike nuk do të marrë pjesë në senacën parlamentare ku do të votohet Presidenti i ri i vendit.
Ai tha se “ky është një proces që vetëm nga ne nuk u bojkotua”.
“Qëndrimi ynë tashmë është i kuptueshëm për këdo. Që në fillim ne jemi futur në këtë proces për ato që ishin detyrime kushtetuese, morale e politike. Ne pa asnjë lloj kompleksi dhe pa u fshehur u futëm në këtë proces. Morëm pjesë dhe përcaktuam rregullat se si procesi duhet të bashkërendohej dhe i përbashkët. Me gjithë tërheqjen dhe mospërmbushjen e detyrës nga ana e Partisë Socialiste. U provua që Rama nuk kishte asnjë lloj synimi që t’i jepte shqiptarëve atë President që thotë Kushtetuta. Presidenti duhet të ishte i të gjitha palëve, dhe këtij procesi në i bëmë të gjitha shërbimet”, shtoi ai.
