Është larguar nga “arresti shtëpiak” për të dytën herën radhazi, Hektor alias Tori Xheçuka, i dënuar dhe arrestuar për “Plagosjen e Rëndë me dashje” ndaj Enrik Metrës, ngjarje kjo e ndodhur në zonën e Burrelit.
Xheçuka njihet si person me rekorde kriminale dhe është ndaluar në nëntor të 2018, si njeri i dyshuar për vrasjen e biznesmenit Emiljano Boçi në Tiranë.
Por masa e arrestit në shtëpi nuk lidhej me ngjarjen e vrasjes së Boçit, por tentativën e vrasjes së Enrik Metrës, i cili nga atentati i ndodhur në Burrel mbeti i plagosur rëndë.
Largimi i tij nga banesa në Tiranë, është konstatuar ne mesin e muajit maj, pasi në shtëpinë ku ai qëndronte, kanë shkuar për verifikimin efektivët e policisë të komisariatit nr.2.
Policia, nuk e ka gjendur Xheçukën në shtëpi dhe menjëherë ka marrë kontakte me familjarët e tij në Kamëz, por edhe aty nuk është gjendur.
Personi që mbahej në “arrest shtëpie”, dyshohet se është larguar në drejtim të Dubait. Efektivë të komisariatit Nr.2 kanë kryer disa kontrolle për lokalizimin dhe arrestimin e Hektor Xheçukës, por pa rezultat.
Që prej janarit 2022, brenda një periudhe 5 mujore Xheçuka, rezulton të jetë larguar dy herë nga banesa e tij, duke thyer masën e sigurimit “arrest në shtëpi”.
Për rastin e largimit të parë, policia mundi ta arrestojë këtë person në zonën e spitalit “Nënë Tereza”. Për këtë thyerje të masës së sigurisë, Xheçukës ju vendos nga gjykata e Tiranës, dhe një masë e dytë “arrest në shtëpi” për akuzën e “Largimit nga vendi që i ka caktuar gjykata”.
Por vetëm 5 muaj nga kjo ngjarje, sërish Xheçuka është larguar dhe prej mbi 15 ditësh nuk ka mundur të arrestohet nga policia. Tashmë largimi i tij nga banesa është refeuar nga policia në prokurori dhe prokurori Shpëtim Garunja, po kryen hetimet.
Ndërsa për rastin e largimit të parë në muajin maj 2022, mësohet se prokurori Bledar Valikaj, e ka marrë të pandehur Xheçukën dhe dosjen ia ka kaluar për gjykim gjykatës së Tiranës./ORA/
