Taulant Balla, kreu i Grupit Parlamentar socialist, tha se janë zhvilluar negociata me të paktën 3 grupe parlamentare të opozitës për zgjedhjen e Presidentit të Republikës.
Balla tha në emisionin Opinion se Partia Socialiste ka bënë një proces konsultimi të brendshëm, madje edhe më të gjerë se kaq, kemi diskutuar në Kryesinë e PS, duke propozuar edhe emrat.
Balla tha se janë disa emra si kandidatë për President, por pa dhënë emra kandidatësh, duke u shprehur se ky eshtë një proces serioz.
“Presidenti i ri do të jetë tërësisht e kundërta e asaj që ka shfaqur Ilir Meta”, tha Balla. Sipas tij, seancës do t´i paraqitet vetëm një emër dhe në orën 18:00 do të kemi Presidentin e Republikës.
“Kam besim se kandidatura e propozuar do të marrë edhe votat e deputetëve të opozitës”, tha Balla.
I pyetur nëse kandidat për President do të jetë Ardian Dvorani, Balla ka shmangur komentet.
