Ditën e sotme, rreth orës 10:00 do të zhvillohet votimi i tretë për zgjedhjen e Presidentit ndërsa nuk ka asnjë kandidaturë.
Në tre raundet e para që tani konsiderohen të djegura, Presidenti zgjidhet me 84 vota.
Në dy raundet e fundit, do të mjaftonte një shumicë e thjesht prej 71 vota për zgjedhjen e tij.
Për paraqitjen e një kandidati zyrtar, nevojiten 20 firma deputetësh.
Si mazhoranca edhe opozita deri tani nuk kanë paraqitur asnjë emër si kandidat.
Gjatë 32 vite pluralizëm politik, Shqipëria ka zgjedhur vetëm në një rast një President konsensual.
Në vitin 2002, me marrëveshje Nano-Berisha, Alfred Moisiu u zgjodh President me 97 vota.
Deri para ndryshimeve Kushtetuese në vitin 2008, përcaktohej se kreu i shtetit zgjidhej vetëm me shumicë të cilësuar (84 vota).
Tashmë, çdo shumicë qeverisëse mund të zgjedhë lehtësish Presidentin pasi i mjaftojnë aq vota sa kalon ligjet më të zakonshme në Parlament.
