Kryetari i grupit parlamentar të PD-së Enkelejd Alibeaj ka reaguar pas deklaratave të Sali Berishës, ku i bëri thirrje deputetit Gazment Bardhi të shpjegojë rolin e tij në vrasjen që ndodhi para zgjedhjeve të 25 prillit në Elbasan.
Sipas Alibeajt, Berisha mbron bandat e Elbasanit edhe pse ai tashmë është peng i tyre, sepse i përdori kundër demokratëve në tentativën e tij për të marrë peng PD.
“PD dënon me forcë përdorimin e një ngjarje të rëndë për interesa të Sali Berishës.Është e pafalshme të shohësh se si Sali Berisha mbron bandat e Elbasanit edhe pse ai tashmë është peng i tyre, sepse i përdori kundër demokratëve në tentativën e tij për të marrë peng PD.Për hallin e tij, Sali Berisha bëri koalicion edhe me Aqif Rakipin, Tom Doshin dhe Vangjush Dakon. Këtë e dinë gjithë demokratët dhe gjithë qytetarët e Shkodrës, Elbasanit dhe Durrësit. Për hallin e tij, Sali Berisha kërkon të shkatërrojë PD-në dhe ta izolojë atë nga çdo partner ndërkombëtar.Siç po shihet çdo ditë në këtë sipërmarrje, ai ka partner kryesor Edi Ramën. Mjafton të shikoni sot vendimin e Komisionit të Ligjeve, për të kuptuar se si Edi Rama është aleati i Sali Berishës. Ata kanë halle të përbashkëta dhe për hallet e tyre duan të bëjnë kurban PD-në”, thuhet në reagim.
Gjatë konferencës për mediet kryetari i PD-së Sali Berisha deklaroi se duhet të zbardhet nga SPAK roli i Gazment Bardhi në ngjarjen e Elbasanit gjatë zgjedhjeve.
“Unë e kuptoj luftën që bën për të shpëtuar shpirtin, por prapë është i pashpresë. Të zbardhë njëherë, të mos i thurë lavde SPAK-ut se do i japin këtë apo atë shans, por të zbardhë rolin e tij te vrasja në Elbasan. E them se askush nuk është për t’u vrarë, jo! Ne jemi vend që nuk kemi dënim me vdekje. Bardhi dhe Balla janë përgjegjësit politikë për atë gjakderdhje në një lagje ku mund të mos ketë patur gjakderdhje ndonjëherë. Para se të rrijë të merret me këto të shkojë dhe të japë sqarime”, tha ai.
Po ashtu, Berisha i është përgjigjur interesit të medieve në lidhje me zgjedhjen e Presidentit të ri.
Ai theksoi se Alibeaj nuk kishte korumin e deputetëve, për të patur kuorum mbledhja e tij, duhet të kishte të paktën 27 deputetë.
“Loja ishte që të mos kishim pluralizëm politik, apo të kemi pluralizëm që e komandojmë si me sustë. Çfarë bëri Alibeaj dje? Tha kam 21 deputetë në mbledhje, kam kuorum. Para 10 ditësh ju tha po ju, grupi parlamentar ka 40 deputetë dhe ne ishin 21 e kisha kuorum. Por dje në mbledhje ishin 4 deputetë që nuk i përkisnin grupit parlamentar të PD, sepse PD, sipas rregullores së Parlamentit, ia ka dhënë grupeve të tjera. Një praktikë kjo standarde. Pra, për të patur kuorum mbledhja e tij, duhet të kishte të paktën 27 deputetë. Por atij kur i intereson e thotë e kam me 40 grupin, një sharlatan që ka mungesë totale respekti për veten e tij, keqpërdoret në mënyrë ekstreme nga Edi Rama, harron se ka patur funksione të rëndësishme dhe në qeveri dhe kur bën akte të tilla vetëm sa shkelmon mbi veten e tij. Ajo që mund t’ju them unë, e thash edhe të dielën, mrekullia shqiptare e shekullit XXI ishte pikërisht shpëtimi i pluralizmit politik. Nuk ishte rikthimi i Sali Berishës, ishte rivendosja e pluralizmit politik”, tha Berisha.
